ஈரோடு, செப். 10: வாரம் இருமுறை கூலி வழங்கும் நடைமுறையை தொடராவிட்டால் கஞ்சித்தொட்டி திறப்பு, உண்ணாவிரதம் உள்ளிட்ட போராட்டம் நடத்தப்படும் என கைத்தறி நெசவாளர்கள் எச்சரிக்கை விடுத்துள்ளனர். சென்னிமலை சென்கோப்டெக்ஸ் கூட்டுறவு சங்கத்தில் 726 நெசவாளர்கள் உறுப்பினர்களாக உள்ளனர். இவர்களுக்கான பாவு நூல் கூட்டுறவு சங்கம் மூலம் வழங்கப்பட்டு பெட்ஷீட் உற்பத்தி செய்து வருகின்றனர். உற்பத்தி செய்யப்பட்ட பெட்ஷீட்டிற்கான நெசவு கூலியானது துவக்கத்தில்  தினமும் வழங்கப்பட்டு வந்தது. பின்னர், வாரத்தில் புதன் மற்றும் சனிக்கிழமைகளில் வழங்கப்பட்டது. 40 ஆண்டுகளாக இந்த நடைமுறை இருந்து வந்த நிலையில் மத்திய அரசு பண மதிப்பிழப்பு நடவடிக்கை மேற்கொண்ட பிறகு வாரம் ஒரு முறை சனிக்கிழமையன்று மட்டுமே கூலி வழங்கப்பட்டு வருகிறது.

இதை மாற்றி முன்பு போலவே வாரம் இருமுறை கூலி வழங்க வேண்டும் என நெசவாளர்கள் வலியுறுத்தி வந்தனர். இதே போல, கூலி ரூ.1500க்கு மேல் இருந்தால் நெசவாளர்களின் வங்கி கணக்கில் மட்டுமே வரவு வைக்கப்படுவதாக கூறப்படுகிறது. வங்கியில் இருந்து பணம் எடுப்பதில் சிரமம் ஏற்படுவதாகவும், இது தொடர்பாக பல முறை வலியுறுத்தியும் கூட்டுறவு சங்கம் எவ்வித நடவடிக்கையும் எடுக்காமல் இருந்து வருவதாக நெசவாளர்கள் புகார் தெரிவித்துள்ளனர்.  இந்நிலையில், இக்கோரிக்கைகளை வலியுறுத்தி நேற்று சென்கோப்டெக்ஸ் சங்க உறுப்பினர்கள் கலெக்டர் கதிரவனிடம் மனு அளித்தனர். அதில், கோரிக்கைகளை நிறைவேற்றாவிட்டால் சாலை மறியல், கஞ்சித்தொட்டி திறப்பு, உண்ணாவிரதம் உள்ளிட்ட போராட்டங்களில் ஈடுபட போவதாக மனுவில் கூறி உள்ளனர்.