வறட்சியை சமாளிக்க நிலத்தடி நீர் செறிவூட்டும் திட்டம் செயல்படுத்தப்படும்

ஈரோடு, ஏப்.16  ஈரோடு மக்களவை தொகுதியில் போட்டியிடும் மதச்சார்பற்ற முற்போக்கு கூட்டணி வேட்பாளர் கணேசமூர்த்தி மொடக்குறிச்சி ஒன்றிய பகுதிகளான முள்ளாம்பரப்பு, கிளியம்பட்டி, என்.ஜி.பாளையம், பூலப்பாளையம், செல்லப்பம்பாளையம், கஸ்பாபேட்டை, அவல்பூந்துறை, புதுப்பாளையம், புங்காட்டுவலசு, சேமூர், சென்னிமலை பாளையம், சுள்ளிமேடு, பள்ளியூத்து, பூலக்காடு உள்ளிட்ட 30க்கும் மேற்பட்ட கிராமங்களில் தீவிர வாக்குசேகரிப்பில் நேற்று ஈடுபட்டார்.பிரசாரத்தின்போது வேட்பாளர் கணேசமூர்த்தி பேசியதாவது: மொடக்குறிச்சி ஒன்றிய பகுதிகள் முற்றிலும் விவசாயம் சார்ந்த பகுதிகளாகும். ஆனால், கடந்த சில ஆண்டுகளாக வறட்சியின் காரணமாக விவசாயம் பாதிக்கப்பட்டு வருகிறது. போதிய மழை இல்லாததால் ஆழ்குழாய் கிணறுகள் அமைத்தாலும் தண்ணீர் கிடைக்காத நிலை இருந்து வருகிறது. எனவே, எதிர்கால நலன் கருதி நிலத்தடி நீர் மட்டத்தை உயர்த்த வேண்டிய கட்டாயம் ஏற்பட்டுள்ளது. ஈரோடு மக்களவை தொகுதிக்குட்பட்ட கிராமப்புறங்களில் உள்ள குளம், குட்டைகளை முழுமையாக தூர்வாரி மழைக்காலங்களில் வீணாகும் தண்ணீரை சேமித்து நிலத்தடி நீர் மட்டம் உயர்த்தும் வகையில் நீர் செறிவூட்டும் திட்டங்கள் கொண்டு வர முக்கியத்துவம் அளிக்கப்படும்.

இதேபோல், விவசாயிகளின் விளை பொருட்களை சேமிக்க ஆங்காங்கே குளிர்பதன கிடங்குகள் அமைக்க நடவடிக்கை எடுக்கப்படும். கிராமப்புறங்களில் குடிநீர் பிரச்னை நீண்டகாலமாக இருந்து வருகிறது. இப்பிரச்னைகளுக்கு தீர்வுகாண புதிதாக கூட்டு குடிநீர் திட்டம் செயல்படுத்தப்படும். தேர்தல் அறிக்கையில் கூறப்பட்டுள்ள சாலை பணியாளர் வேலை வாய்ப்பு, பெண்களுக்கு மக்கள் நலப்பணியாளர் வேலை, கிராமப்புற பெண்களுக்கு சிறு தொழில் துவங்க வட்டி இல்லாத கடன், விவசாயிகளின் வங்கி கடன் தள்ளுபடி, விவசாய தொழிலாளர்களின் நகை அடமான கடன் தள்ளுபடி உள்பட அனைத்து வாக்குறுதிகளும் நிறைவேற்ற பாடுபடுவேன்.இவ்வாறு அவர் பேசினார். வாக்குசேகரிப்பின் போது திமுக ஒன்றிய செயலாளர் குணசேகரன், திமுக மாவட்ட இளைஞரணி அமைப்பாளர் பிரகாஷ், காங்கிரஸ் மாவட்ட தலைவர் மக்கள்ராஜன் மற்றும் கூட்டணி கட்சி நிர்வாகிகள் கலந்து கொண்டனர்.

Related Stories: