கோவில்பட்டி, பிப்.21: கோவில்பட்டி அருகே செவல்பட்டி புனித அந்தோணியார் ஆலய திருவிழா நிறைவு விழாவில் சிறப்பு திருப்பலி நடந்தது. விழாவில் கிறிஸ்தவ மக்கள் திரளாக கலந்து கொண்டனர். கோவில்பட்டி அருகே காமநாயக்கன்பட்டி பங்கான செவல்பட்டி புனித அந்தோணியார் ஆலய திருவிழா கடந்த 7ம்தேதி கொடியேற்றத்துடன் துவங்கியது. இதையொட்டி அன்று மாலை 6.30 மணிக்கு பசுவந்தனைரோடு செவல்பட்டி விலக்கு அருகில் புனித அந்தோணியார் ஆலய நுழைவு வாயில் திறக்கப்பட்டது. மதுரை அனுமந்தபட்டி தந்தை ஞானபிரகாசம் நுழைவு வாயிலை அர்ச்சிக்க, சேரன்மகாதேவி பங்குத்தந்தை ரெக்ஸ் ஜஸ்டின் திறந்து வைத்தார். பின்னர் பங்குத்தந்தை ரெக்ஸ் ஜஸ்டின் இரவு 7.30 மணிக்கு கொடியை ஜெபித்து கொடியேற்றி வைத்தார். பின்னர் புதிதாக வடிவமைக்கப்பட்ட தேக்கு மரத்தால் ஆன புதிய பீடம் அர்ச்சித்து திறக்கப்பட்டது. தொடர்ந்து திருவிழா 13 நாட்கள் நடந்தது. விழா நாட்களில் தினமும் திருப்பலி, மறையுரை மற்றும் சமபந்தி விருந்து நடந்தது.