பட்டிவீரன்பட்டி, டிச. 12: கட்டிய 7 ஆண்டுகளிலே பெரும்பாறை அரசு சுகாதார நிலைய கட்டிடத்தின் மேற்கூரை சிமெண்ட் பூச்சுகள் அடிக்கடி பெயர்ந்து விழுகின்றன. இதனால் நோயாளிகள் அச்சத்துடன் சிகிச்சை பெற்று வருகின்றனர். பெரும்பாறை அரசு ஆரம்ப சுகாதார நிலையம் தாண்டிக்குடி ரோட்டில் உள்ளது. தமிழ்நாடு பொது சுகாதாரத்துறை சார்பில் 2011ம் ஆண்டு ரூ.21.92 லட்சம் செலவில் மதிப்பீட்டில் கட்டப்பட்ட இந்த சுகாதார நிலையத்தில் 5 படுக்கைகள் உள்ளன. 1 மருத்துவர், 2 செவிலியர்கள் பணியில் உள்ளனர். இங்கு பெரும்பாறை, கேசி பட்டி, கொங்கபட்டி, கவியக்காடு, நல்லூர்காடு, காமனூர், கல்லாங்கிணறு, தாண்டிக்குடி, கானல்காடு, குப்பம்மாள்பட்டி, மஞ்சள்பரப்பு, குத்துக்காடு உள்ளிட்ட 20க்கும் மேற்பட்ட மலைக்கிராம மக்கள் பல்வேறு நோய்களுக்கு சிகிச்சை பெற வருகின்றனர். இம்மருத்துவமனை கட்டப்பட்டு 7 ஆண்டுகள்தான் ஆகிறது. அதற்குள் நோயாளிகள் காத்திருப்பு அறை கட்டிடத்தின் மேற்கூரையில் மழைநீர் கசிந்து சிமெண்ட் பூச்சுகள் பெயர்ந்து விழுகின்றன. மேலும் படுக்கைகள் உள்ள அறையில் சுவர் விரிசல் ஏற்பட்டுள்ளது. இதனால் நோயாளிகள் அச்சத்துடனே சிகிச்சை பெற வருகின்றனர். தவிர, இங்கு பிரசவம் செய்து கொள்ளும் பெண்கள் பச்சிளம் குழந்தைகளுடன் எப்போது வீட்டிற்கு செல்வோம் என அச்ச உணர்வுடன் தங்கி வருகின்றனர். மேலும் மழைநீர் கசிவால் நோயாளிகளுக்கு வழங்க வைத்திருக்கும் மாத்திரைகள் தண்ணீர் பட்டு வீணாகிறது.