நன்றி குங்குமம் டாக்டர்

‘ஓடுற பாம்பை மிதிக்கிற வயசு’ என்று இளம் வயதைச் சொல்வார்கள். துடிப்பும் துறுதுப்பும் மிக்க இளைஞர்கள்கூட இன்று ‘கை, கால் வலி, மூட்டுவலி’ என்று மருத்துவமனைக்குப் படை யெடுக்கிறார்கள். என்ன பிரச்னை என்று கேட்டால், ‘ஆர்த்ரைட்டிஸ்’ என்கிறார்கள். நிற்க முடியவில்லை, நடக்க முடியவில்லை எந்த வேலையையும் இயல்பாகச் செய்யவில்லை என வாழ்க்கைமுறையே அடியோடு மாறிவிடுகிறது.  

இளைஞர்களையே ஆர்த்ரைட்டிஸ் இந்தப் பாடுபடுத்துகிறது என்றால் முதியவர்களுக்குத் தரும் தொல்லைகள் சொல்லில் இல்லாத சோகம். முதுமையின் அவஸ்தை ஒருபுறம் என்றால் ஆர்த்தரைட்டிஸ் அவஸ்தை மறுபுறம் எனப் பலரும் இந்நாட்களில் தவித்துக்கொண்டிருக்கிறார்கள். இன்று ஆர்த்ரைட்டிஸ் குழந்தைகள் முதல் முதியவர்கள் வரை யாருக்கு வேண்டுமானாலும் வரக்கூடும் என்ற நிலை உள்ளது. ஆர்த்ரைட்டிஸ்க்கு இன்று நவீன சிகிச்சைகள் வந்துவிட்டன. ஆரம்ப நிலையிலேயே கண்டறிந்தால் இதற்கு நல்ல தீர்வுகள் உள்ளன.

ஆர்த்ரைட்டிஸ்

உடலில், இரண்டு எலும்புகள் சேரும் இடத்தை இணைப்புகள் (Joints) என்கிறோம். இப்படி இரண்டு எலும்புகளை ஒருங்கிணைக்க இணைப்புத்திசுக்களும் கார்டிலேஜ் திசுக்களும், லிகமென்ட் எனப்படும் தசைநார்களும், குருத்தெலும்புகளும் உதவுகின்றன. கை, கால்மூட்டுகள் மற்றும் உடலில் இரண்டு எலும்புகள் கூடும் இணைப்புகளில் வலி, வீக்கம், இறுக்கமான உணர்வு, இன்ஃப்ளமேஷன்  இருந்தால் அது ஆர்த்ரைட்டிஸ் எனும் பிரச்னையாக இருக்கக்கூடும்.

இணைப்பு எலும்புகளுக்கு இடையே குஷன் போன்று உள்ள கார்ட்டிலேஜ் எனப்படும் குழைவான திசுக்கள் அமைப்பு நைந்துபோகும்போது குருத்தெலும்புகளும், மூட்டு எலும்புகளும் ஒன்றோடு ஒன்று உராய்ந்து தேய்வதால், வலி, வீக்கம் ஏற்பட்டு ஆர்த்ரைட்டிஸ் பிரச்னை ஏற்படுகிறது. இந்தப் பிரச்னை ஏற்படுவதற்கு அதிக எடை, வயதாகுதல், பரம்பரை, லிகமென்ட் கிழிந்துபோதல், விபத்துகளில் அடிபடுதல், புகைபிடித்தல் போன்ற பல காரணங்கள் உள்ளன.

அறிகுறிகள் மற்றும் பாதிப்புகள்

இணைப்புகள், மூட்டுக்களில் வலி, வீக்கம், இறுக்கமான உணர்வு ஆகியவைதான் ஆர்த்ரைட்டிஸின் பொதுவான அறிகுறி. இந்த வலி மற்றும் இறுக்கம் சிலருக்கு அதிகமாகவும் சிலருக்கு குறைவாகவும் இருக்கக்கூடும். சிலருக்கு, குறிப்பிட்ட இடைவெளியில் வந்து போவதாகவும் இருக்கக்கூடும். நாட்பட்ட ஆர்த்ரைட்டிஸ் பிரச்னையைக் கவனிக்காமல் விட்டால், இணைப்புகளில் நிரந்தரமான பாதிப்பை ஏற்படுத்துவதோடு சிலவகை ஆர்த்ரைட்டிஸ்கள் இதயம், கண்கள், நுரையீரல், சிறுநீரகம் ஆகிய உறுப்புகளையும் பாதிக்க வாய்ப்பு உள்ளது.

பரிசோதனைகள்

பொதுவாக, ஆர்த்ரைட்டிஸ் பிரச்னைக்கு எக்ஸ்ரே பரிசோதனை மட்டுமே போதுமானது. ரூமட்டாய்டு ஆர்த்ரைட்டிஸ் பிரச்னைக்கு ரத்தப்பரிசோதனை எடுக்க வேண்டியது அவசியம்.

ஆர்த்ரைட்டிஸ் வகைகள்

நூற்றுக்கணக்கான ஆர்த்ரைட்டிஸ்கள் வகைகள் இதுவரை கண்டறியப்பட்டுள்ளன. இவற்றில் பொதுவாக ஆஸ்டியோ ஆர்த்ரைட்டிஸ் எனப்படும் டிஜெனரேட்டிவ் பிரச்னையும் ரூமட்டாய்டு ஆர்த்ரைட்டிஸ் எனப்படும் ரத்தத்தில் ஏற்படும் குறைபாட்டால் வரும் ஆர்த்ரைட்டிஸ் பிரச்னையும் முக்கியமானவை. இவைதான் பெரும்பாலானவர்களைப் பாதிக்கும் தீவிர ஆர்த்ரைட்டிஸ் பிரச்னை. இதைத் தவிர குழந்தைகளுக்கு ஏற்படும் ஜுவனைல் ஆர்த்ரைட்டிஸ், தொற்றுக்கிருமிகளால் ஏற்படும் இன்ஃபெக்ட்சியஸ் ஆர்த்ரைட்டிஸ், வளர்சிதை மாற்றப் பிரச்னைகளால் ஏற்படும் மெட்டபாலிக் ஆர்த்ரைட்டிஸ் போன்ற பிரச்னைகளும் நம் நாட்டில் அதிகமாக உள்ளன.      

ஆஸ்டியோ ஆர்த்ரைட்டிஸ் தீர்வுகள்

1.பிசியோதெரப்பி,

2.ஓய்வு,

3.ஐஸ்கட்டி மற்றும் வெந்நீர் ஒத்தடம்,

4.ஸ்ட்ரெச்சிங் பயிற்சிகள்

5.சரியான உடல் எடைப் பராமரிப்பு,

6.இணைப்புகள், மூட்டுகளைச் சுற்றிலும் உள்ள தசையை வலுவாக்கும் பயிற்சிகள்,

7. வலி நிவாரணிகள் மற்றும் ஆன்டி இன்ஃப்ளமேட்டரி மருந்து, மாத்திரைகள்,

8.போதுமான ஓய்வு,

9. தீவிரப் பாதிப்பு என்றால் மூட்டு மாற்று அறுவைசிகிச்சை,

10.உணவு மற்றும் வாழ்க்கைமுறை மாற்றங்கள்.

ஆர்த்ரைட்டிஸைத் தவிர்க்கும் உணவுகள்

ஒமேகா 3 கொழுப்பு அமிலங்கள் நிறைந்த மீன், ஃபிளக்ஸ் விதைகள், ஆளிவிதைகள், வால்நட், முட்டையின் மஞ்சள் கரு, சோயா பீன்ஸ், காலிஃபிளவர் போன்ற உணவுகளை எடுத்துக்கொள்ளலாம். வெள்ளைச் சர்க்கரை எனப்படும் அஸ்கா சர்க்கரையை முற்றிலுமாகத் தவிர்க்க வேண்டும். புகையிலை, சிகரெட், மதுவை அறவே தவிர்க்க வேண்டும்.

தொகுப்பு - சரஸ்