தோஹா: உலக கோப்பை கால்பந்து தொடரின் எச் பிரிவு லீக் ஆட்டத்தில், உருகுவேயை 2-0 என்ற கோல் கணக்கில் உருட்டித் தள்ளிய போர்ச்சுகல் அணி ‘நாக் அவுட்’ சுற்றையும் உறுதி செய்தது. லுசெய்ல் அரங்கில் நேற்று நடந்த 32வது லீக் ஆட்டத்தில் எச் பிரிவில் உள்ள போர்ச்சுகல் (9வது ரேங்க்) - உருகுவே (14வது ரேங்க்) அணிகள் மோதின. இரண்டு முறை உலக கோப்பையை வென்ற உருகுவே முதல் ஆட்டத்தில் கொரியா உடன் 0-0 என டிரா செய்திருந்தது. சாம்பியன் கனவில் இருக்கும் போர்ச்சுதல் முதல் ஆட்டத்தில் கானாவை 3-2 என்ற கோல் கணக்கில் போராடி வீழத்தி இருந்தது. அதனால் 2வது ஆட்டத்தில் வெற்றி அவசியம் என்ற நெருக்கடியுடன் 2 அணிகளும் களம் கண்டன. முதல் பாதியில் கோலடிக்க போர்ச்சுகல் மல்லுக்கட்ட, அதற்கு கொஞ்சமும் சளைக்காமல் உருகுவேயும் ஈடுகொடுத்து விளையாட ஆட்டத்தில் அனல் பறந்தது. இடைவேளையின்போது இரு அணிகளும் 0-0 என்ற கணக்கில் சமநிலை வகித்தன. 2வது பாதியின் தொடக்கத்தில் கேப்டன் கிறிஸ்டியானோ ரொனால்டோ அடித்த கோல் ‘ஆஃப் சைடு’ என நிராகரிக்கப்பட்டது.