வாஷிங்டன்: முற்றிலும் மின்சார ஆற்றலில் இயங்கும் வகையில் வடிவமைக்கப்பட்டுள்ள விமானம் வெற்றிகரமாக சோதனை ஓட்டத்தை நிறைவு செய்துள்ளது. அமெரிக்காவில் ஏவியேஷன் ஏர் கிராப் என்ற நிறுவனம் முற்றிலுமாக பேட்டரியால் இயங்கும் வகையில் விமானம் ஒன்றை வடிவமைத்திருக்கிறது. ஆலிஸ் என்று பெயர் சூட்டப்பட்டிருக்கும் இந்த விமானத்தின் சோதனை ஓட்டம் நேற்று நடைபெற்றது. வாஷிங்டனில் உள்ள கிராண்ட் கவுண்டி சர்வதேச விமான நிலையத்தில் இருந்து இந்த மின்சார விமானம் திட்டமிட்டபடி வெற்றிகரமாக பறந்தது. சுமார் 8 நிமிடங்கள் வரை வானத்தில் பறந்த ஆலிஸ் மின்சார விமானம், 3,500 அடி உயரத்தை எட்டிய பிறகு வெற்றிகரமாக தரையிறங்கியது.