மும்பை: அமெரிக்க டாலருக்கு நிகரான இந்திய ரூபாயின் மதிப்பு 58 காசுகள் சரிந்து வரலாறு காணாத வரையில் 81.67 ஆக வீழ்ச்சி அடைந்துள்ளது. உக்ரைன் போர், சர்வதேச அளவில் பொருளாதார நெருக்கடி உள்ளிட்ட காரணங்களால் இந்திய ரூபாயின் மதிப்பு தொடர்ந்து வீழ்ச்சி அடைந்து வருகிறது. இந்நிலையில், நேற்று வர்த்தகம் தொடங்கிய போது அமெரிக்க டாலருக்கு நிகரான ரூபாயின் மதிப்பு ரூ.81.47 ஆக இருந்த நிலையில், வர்த்தக முடிவில் 58 காசுகள் சரிந்து ரூ.81.67 ஆக சரிந்தது. வரலாற்றில் ரூபாய் வீழ்ச்சியின் புதிய உச்சம் இது.

கடந்த வெள்ளிக்கிழமை, ரூபாயின் மதிப்பு 30 காசுகள் சரிந்து ரூ.81.09 ஆக இருந்தது. சர்வதேச கச்சா எண்ணெய் விலை பேரலுக்கு 0.70 சதவீதம் குறைந்து 85.55 டாலராக நேற்று இருந்தது. அதே சமயம், ரூபாயை போலவே இந்திய பங்குச்சந்தையும் கடுமையான வீழ்ச்சி கண்டது. மும்பை பங்குச்சந்தை பிஎஸ்இ 954 புள்ளிகள் சரிந்து 57,145 புள்ளிகளாகவும், நிப்டி 311 புள்ளிகள் சரிந்து 17,016 புள்ளிகளாகவும் இருந்தன. ரூபாய் மதிப்பு தொடர் வீழ்ச்சி காரணமாக, ரிசர்வ் வங்கி, கடன்களுக்கான வட்டி விகிதத்தை மேலும் உயர்த்தும் என எதிர்பார்க்கப்படுகிறது.