காலாப்பட்டு : புதுவை அடுத்த தமிழக பகுதியான மரக்காணம் ஒன்றியம் கீழ்புத்துப்பட்டு கிராமத்தில் சுமார் ஆயிரத்துக்கும் மேற்பட்ட மக்கள் வசித்து வருகின்றனர். இந்த பகுதியில் ரூக்கர் தெரு, மேட்டுத்தெரு, கொட்டக்கார் தெரு உள்ளிட்ட பல பகுதிகளில் எப்போதும் தண்ணீர் தேங்கி சேறும் சகதியுமாக காட்சியளிக்கிறது.இதுகுறித்து பலமுறை புகார் அளித்தும் உரிய நடவடிக்கை எடுக்கப்படவில்லை. இதனால் மக்கள் தினமும் சேற்றில் நடக்க வேண்டியுள்ளது. சேற்றில் கொசுக்கள் பெருகுவதால் இப்பகுதியினர் சரியாக தூங்க முடிவதில்லை. மேலும் இதனால் இப்பகுதியில் நோய்த்தொற்று ஏற்படவும் வாய்ப்பு உள்ளது. இவ்வழியே பள்ளிக்கு செல்லும் மாணவ, மாணவிகள் மிகவும் சிரமப்படுகிறார்கள்.