சென்னை: சென்னை மாநகர பகுதிகளில் நீர் ஆதாரங்களை அதிகரிப்பதற்கான விரிவான திட்ட அறிக்கையை தயாரிக்க விரைவில் ஆலோசகர் ஒருவரை நியமிக்கப்படுவார் என்று தமிழக நீர்வளத்துறை அதிகாரிகள் தெரிவித்தனர். இதுகுறித்து தமிழக நீர்வளத் துறை அதிகாரிகள் கூறியதாவது: தமிழக நீர்வளத் துறை, அதிகரித்து வரும் சென்னை மாநகராட்சியின் குடிநீர்த் தேவைக்கு ஏற்ப நீர் ஆதாரங்களை அதிகரிக்க நடவடிக்கை எடுத்து வருகிறது.

இதன் ஒருபகுதியாக நீர் ஆதாரங்களை உருவாக்கவும், நீர்நிலைகளின் சேமிப்பு அளவை அதிகரிக்கவும் விரிவான திட்ட அறிக்கையைத் தயாரிக்க விரைவில் ஒரு ஆலோசகரை நியமிக்க திட்டமிட்டுள்ளது. இந்த திட்டம் செயல்பாட்டுக்கு வந்தால், சென்னைக்கு நீர் வழங்கக்கூடிய சேமிப்பு திறன் 4.6 டிஎம்சியாக அதிகரிக்கும். இதற்காக, விரிவான திட்ட அறிக்கை தயாரிக்க மட்டும் ரூ.5.12 கோடி நிதி ஒதுக்கீடு செய்யப்பட்டுள்ளது.

தற்போது, ​​பூண்டி, செம்பரம்பாக்கம், புழல், சோழவரம், கண்ணன்கோட்டை-தேர்வாய்கண்டிகை மற்றும் வீராணம் ஆகிய இடங்களில் உள்ள நீர்நிலைகளில் 13 டிஎம்சி நீர் இருப்பு உள்ளது. இவற்றின் மூலம்தான் சென்னை மாநகராட்சி மற்றும் சுற்றுவட்டாரத்தில் உள்ள சிறு நகரங்களின் குடிநீர் தேவை பூர்த்தி செய்யப்படுகிறது. எனினும், சென்னை மற்றும் தொழில்துறை நுகர்வோரின் ஆண்டு தண்ணீர் தேவை 22 டிஎம்சியாக உள்ளது. எனவே, நகரில் ஆற்றின் குறுக்கே ராமஞ்சேரி மற்றும் பூண்டி நீர்த்தேக்கத்தின் மேல்பகுதியில் புதிய நீர்ஆதாரத்தை உருவாக்க நீர்வளத்துறை திட்டமிட்டுள்ளது. ஏறக்குறைய 9.20 சதுர கிலோமீட்டர் பரப்பளவைக் கொண்ட நீர்நிலை, கிட்டத்தட்ட 1.20 டிஎம்சி நீரை சேமிக்கும். அதன் உபரி நீர் பூண்டி நீர்த்தேக்கத்திற்குச் செல்லும்.

தற்போதுள்ள நீர்நிலைகளின் கொள்ளளவை அதிகரிக்கவும் நீர்வளத்துறை முன்மொழிந்துள்ளது. இது கீழ்நிலை வெள்ளத்தைத் தணிக்கவும் உதவும். பூண்டியில் உள்ள பெரிய நீர்த்தேக்கத்தை மேலும் 1.77 டி.எம்.சி கொள்ளளவு கொண்டதாக அதிகரிக்க திட்டமிடப்பட்டுள்ளது. தற்போது இது 3.2 டி.எம்.சி. கொள்ளளவு கொண்டதாக உள்ளது. தூர்வாருதல், கட்டிட வேலை உள்ளிட்டவற்றை பெருக்கும் வழிமுறைகள் குறித்த அறிக்கையை ஆலோசகர் சமர்ப்பிப்பார்.  அதன் பிறகு அந்த திட்டம் செயல்பாட்டுக்கு வரும்.

மாங்காடு அருகே சிக்கராயபுரத்தில் கைவிடப்பட்ட குவாரிகளில் கிட்டத்தட்ட 0.4 டிஎம்சி அடி தண்ணீரை நாம் புத்துயிர் பெற்று சேமிக்க முடியும். 2019 வறட்சியின்போது இந்த குவாரிகளில் இருந்து தண்ணீர் பயன்படுத்தப்பட்டது. மேலும், நேமம் மற்றும் திருநின்றவூரில் உள்ள நீர்நிலைகளின் சேமிப்பு திறன் அதிகரிக்கப்படும். முதற்கட்ட விசாரணைக்குப் பிறகு நாங்கள் முன்மொழிவுகளைக் கொண்டு வந்துள்ளோம். கடலில் கலக்கும் மற்றும் சுற்றியுள்ள பகுதிகளை தேங்கும் வெள்ளநீரை சேமிக்கவும் இந்த திட்டம் உதவும். இவ்வாறு அவர்கள் கூறினர்.