×

நுரையீரல் புற்றுநோயை தடுப்பது எப்படி?!

நன்றி குங்குமம் டாக்டர்  

புற்றுநோய் பாதிப்பில் உலக அளவில் தொடர்ந்து முதலிடம் வகிப்பது நுரையீரல் புற்றுநோய். 10 ஆண்டுகளுக்கு முன்பு எடுத்த புள்ளிவிவரப்படி உலகில் 18 கோடி பேருக்கு நுரையீரல் புற்றுநோய் ஏற்பட்டதாகவும், அவர்களில் 13 கோடி பேர் உயிரிழந்துவிட்டதாகவும் தெரிகிறது. இந்தியாவில் 2012-ம் ஆண்டில் 12 லட்சம் பேருக்கு இந்தப் புற்றுநோய் வந்திருந்ததாகவும், இந்த எண்ணிக்கை ஆண்டுதோறும் அதிகரித்து வருவதாகவும் தெரிய வந்துள்ளது. இந்தியாவில் புற்றுநோயால் இறப்பவர்களில் நுரையீரல் புற்றுநோய் இரண்டாம் இடத்தில் இருக்கிறது.

மற்ற புற்றுநோய்களைப் போலவே, நுரையீரல் புற்றுநோயும் அதன் அடிப்படை செல்களிலிருந்துதான் உண்டாகிறது. புற்றுநோயை உருவாக்கும் காரணிகளால் இந்த செல்கள் தொடர்ந்து தூண்டப்படும்போது, அவை தம் இயல்பான வளர்ச்சிப்படிகளில் இருந்து விலகி, தவறான, கட்டுப்பாடில்லாத வளர்ச்சிநிலைகளுக்குச் சென்றுவிடுகின்றன. இதனால் அந்த செல்கள் புற்றுசெல்களாக மாறிவிடுகின்றன. அவை உருவாக்கும் கட்டிகள் புற்றுக்கட்டிகளாக வளர்கின்றன. இவையே முதன்மை நுரையீரல் புற்றுக் கட்டிகள்(Primary Lung Cancer) என்று அழைக்கப்படுகின்றன.

என்ன காரணம்?

நுரையீரல் புற்றுநோய் ஏற்படுவதற்கு முதல் காரணமாகவும் முக்கியக் காரணமாகவும் இருப்பது ஆண்களின் ஆறாவது விரல் என அழைக்கப்படும் பீடி, சிகரெட், சிகார் புகைக்கும் பழக்கம் மற்றும் குட்கா பயன்படுத்தும் பழக்கமும்தான் என்கிறது உலக சுகாதார நிறுவனம். புகைப்பழக்கம் உள்ளவர்களில் 90% பேருக்கு இந்தப் புற்றுநோய் வருவது உறுதி செய்யப்பட்டுள்ளது. மேலும் புகைப்பவருக்கு அருகில் இருக்கும் குடும்பத்தினர், நண்பர்கள் ஆகியோரும் அந்தப் புகையை சுவாசிக்க நேர்ந்தால், அவர்களுக்கும் நுரையீரல் புற்றுநோய் வரும் வாய்ப்பு அதிகரிக்கிறது. 100 பேரில் 3 பேருக்கு இவ்வாறாக நுரையீரல் புற்றுநோய் வருகிறது.

வாகனப்புகை, தொழிற்சாலை புகை, கரிப்புகை, கட்டுமானப் புகை உள்ளிட்ட மாசு கலந்த காற்றைச் சுவாசிக்கும் வாய்ப்பு அதிகமுள்ளவர்களுக்கு நுரையீரல் புற்றுநோய் ஏற்படும் வாய்ப்பும் அதிகரிக்கிறது. காரணம், நாம் சுவாசிக்கும் காற்றில் மாசுத் துகள் 2.5 அளவுக்கு(PM 2.5) அதிகமென்றால் அது தினமும் ஒரு சிகரெட் புகைப்பதற்கு சமம். இது தவிர ஆஸ்பெஸ்டாஸ், ஆர்செனிக், நிக்கல், குரோமியம், யுரேனியம், தார், ரேடான், இரும்புச் சுரங்கம் போன்ற தொழில்துறைகளில் பணிபுரிவோருக்கு நுரையீரல் புற்றுநோய் தாக்கும் ஆபத்து உண்டு. அதிகமாக மது அருந்துவோருக்கும் இந்த ஆபத்து ஏற்படுவது உண்டு. வம்சாவளியிலும் இந்த நோய் வருவதுண்டு. 40 வயதுக்கு உட்பட்டவர்களுக்கு இந்த வழியில்தான் நுரையீரல் புற்றுநோய்
வருகிறது.

உணவும் நுரையீரல் புற்றுநோயும்

நுரையீரல் புற்றுநோய் ஏற்படுவதற்கு சில உணவுகளும் காரணமாகின்றன என்பது தெரிய வந்துள்ளது. குறிப்பாக, பீட்டா கரோட்டீன் என்னும் வைட்டமின் ஏ சத்து குறைந்த உணவைத் தொடர்ந்து சாப்பிடும் பழக்கம் உள்ளவர்களுக்கு இந்த நோய் ஏற்படுவது அதிகரிக்கிறது. விலங்கின இறைச்சிகளையும் சீஸ், வெண்ணெய் போன்ற பால் பொருட்களை அளவுக்கு அதிகமாக உண்ணும் பழக்கம் உள்ளவர்களுக்கும் நுரையீரல் புற்றுநோய் ஏற்படுகிறது. அதே நேரத்தில் கேரட், ஆப்பிள், தக்காளி, பூசணி, வெங்காயம், வாழைப்பழம், பச்சைக் காய்கறிகள் ஆகியவற்றை உணவில் அதிகம் சேர்த்துக்கொள்வோருக்கு நுரையீரல் புற்றுநோய் வருவது தடுக்கப்படுகிறது என்பதும் உறுதி செய்யப்பட்டுள்ளது. கேரட்டில் உள்ள பீட்டா கரோட்டீன், தக்காளியில் உள்ள லைக்கோபீன், ஆப்பிளில் உள்ள ஃப்ளேவனாய்டுகள், பச்சைக் காய்கறிகளில் உள்ள ஐசோதயோசயனேட்டுகள் போன்றவை புற்றுநோய் செல்களை அழிக்கும் தன்மை கொண்டவை என்பதால், இந்த நன்மை கிடைக்கிறது.

அறிகுறிகள் என்ன?

நுரையீரல் புற்றுநோய்க்கான அறிகுறிகள் இரண்டு விதமாக உண்டாகின்றன. ஒன்று, முதன்மை நுரையீரல் புற்றுநோய் காரணமாக ஏற்படுவது. இரண்டாவது, உடலில் மற்ற இடங்களிலிருந்து புற்று செல்கள் நுரையீரலுக்கு வந்து நுரையீரல் புற்றுநோயை உண்டாக்குவதால்(Secondary lung cancer) ஏற்படுவது. நாட்பட்ட இருமல், நெஞ்சு வலி, சுவாசிப்பதில் சிரமம், இருமலில் ரத்தம், சளியில் ரத்தம், பசி குறைவது, உடல் எடை குறைவது, தொடர்ந்து களைப்பாக இருப்பது போன்ற அறிகுறிகள் சாதாரணமாகவும் இருக்கலாம்; நுரையீரல் புற்றுநோயின் முதல்கட்ட அறிகுறிகளாகவும் இருக்கலாம். சாதாரணம் என்று அலட்சியப்படுத்தாமல் மருத்துவப் பரிசோதனைகளைச் செய்துகொண்டால், நுரையீரல் புற்றுநோயை ஆரம்பத்திலேயே ‘கைது’ செய்துவிடலாம்.

என்ன பாதிப்புகள்?

இந்த நோயை ஆரம்பத்தில் கவனிக்கத் தவறினால் உடலில் மற்ற உறுப்புகளுக்கும் பரவிவிடும். முக்கியமாக, உணவுக்குழாய், சுவாசக்குழாய் ஆகியவற்றைத் தாக்கும். இந்த செல்கள் ரத்தம் மற்றும் நிணநீர் வழியாக உடலின் பிற பாகங்களுக்கும் பரவும். மூளை, தண்டுவடம், கல்லீரல், எலும்பு போன்றவற்றுக்குப் பரவுவது இந்த வழியில்தான். அப்போது புற்றுநோய் பரவியுள்ள உறுப்புக்கு ஏற்ப அறிகுறிகள் தோன்றும். உதாரணமாக, இந்த நோய் குரல்வளை நரம்புகளை அழுத்தும்போது குரலில் மாற்றம் தோன்றும். உணவுக்குழாயை அழுத்தும்போது, உணவை விழுங்குவதில் சிரமம் உண்டாகும். மூளைக்குப் பரவியிருந்தால், கடுமையான தலைவலி தொடர்ந்து இருக்கும்; வாந்தி, வலிப்பு ஏற்படும். எலும்பில் பரவியிருந்தால், மூட்டுவலி, முதுகுவலி, இடுப்புவலி போன்ற தொல்லைகள் தொடங்கும். புற்றுநோய் பரவியுள்ள உறுப்புக்கு அருகில் நிணநீர்க்கட்டிகள் வீங்கிப் புடைக்கும்; வலிக்கும்.

என்னென்ன பரிசோதனைகள்?


மார்பு எக்ஸ்-ரே, சி.டி. ஸ்கேன் பரிசோதனைகளில் நுரையீரல் புற்றுநோய் இருப்பதைக் கண்டுபிடிக்க முடியும். சிலருக்கு, எம்.ஆர்.ஐ. ஸ்கேன் அல்லது பெட் ஸ்கேன் தேவைப்படலாம். இந்த இரு பரிசோதனைகளும் நுரையீரல் புற்றுநோய் எந்த நிலையில்(Stage) உள்ளது என்பதையும் காட்டிவிடும்; நுரையீரல் புற்றுநோய்க்குத் தரப்படும் சிகிச்சை பலன் தருகிறதா, இல்லையா என்பதையும் இந்தப் பரிசோதனைகளில் தெரிந்துகொள்ள முடியும். எலும்பு ஸ்கேன் மூலம் நுரையீரல் புற்றுநோய் எலும்புகளில் பரவியுள்ளதா எனத் தெரிந்துகொள்ளலாம். பிராங்காஸ்கோப்பி மூலம் மூச்சுக்குழாயில் சளியை எடுத்துப் பரிசோதித்தால், அந்தச் சளியில் புற்று செல்கள் இருப்பது தெரிய வரும். சில ரத்தப் பரிசோதனைகளும் நுரையீரல் புற்றுநோயைக் கணிக்க உதவும். சிலருக்கு ‘மாஸ்டர் ஹெல்த் செக் அப்’ செய்யப்படும்போது, தற்செயலாகவும் இந்தப் புற்றுநோய் இருப்பது தெரிய வரும்.

திசு பரிசோதனை

நுரையீரல் புற்றுநோய்க்கு திசு ஆய்வுப் பரிசோதனை(Biopsy) முக்கியமானது. அல்ட்ரா சவுண்ட் ஸ்கேன் அல்லது சி.டி. ஸ்கேன் உதவியுடன் புற்றுநோயுள்ள உறுப்பிலிருந்து சிறிதளவு திசுவை வெட்டி எடுத்துப் பரிசோதிப்பார்கள். இதில் புற்றுநோயின் இருப்பிடம், வகை, நிலை போன்ற பல தகவல்கள் தெரிந்துவிடும். குறிப்பாக, Immunohistochemistry என்னும் சிறப்புப் பரிசோதனையில் நோயின் வகை மிகத் துல்லியமாகத் தெரிந்துவிடும். இப்போது ‘திரவத் திசுப் பரிசோதனை’ (Liquid biopsy) வந்துள்ளது. இது உடலுறுப்பைக் கீறாமல் நோயைக் கணிக்க உதவுகிறது. நுரையீரல் புற்றுநோயில் சிறு செல் வகை(SCLC) என்றும் சிறு செல் அல்லாத வகை(NSCLC) என்றும் இரு வகை உண்டு. சிறு செல் அல்லாதவற்றில் அடினோ வகை, ஸ்குவாமஸ் வகை என உட்பிரிவுகளும் உண்டு. பாதிக்கப்பட்ட நோயாளிக்கு எந்த வகை புற்று, எந்த நிலையில் உள்ளது என்பதை உறுதிசெய்த பிறகு, சிகிச்சைமுறை தேர்வு செய்யப்படும்.

என்னென்ன சிகிச்சைகள் உள்ளன?


நெஞ்சக அறுவை சிகிச்சை நிபுணர், புற்றுநோய் அறுவை சிகிச்சை நிபுணர், கதிரியக்க மருத்துவ நிபுணர் ஆகியோர் அடங்கிய நிபுணர் குழு நோயாளியை ஆராய்ந்து நோயின் நிலையைக் குறிக்கின்றனர். அதற்கேற்ப அவருக்குத் தேவையான சிகிச்சைமுறையைத் தேர்வு செய்கின்றனர். முதல் கட்டத்தில் அல்லது இரண்டாம் கட்டத்தில் நோய் இருந்து, நோயாளி அறுவை சிகிச்சைக்கு ஏற்றவராக இருந்தால், அறுவை சிகிச்சை மேற்கொள்ளப்படும். அதைத் தொடர்ந்து, கீமோதெரபி என்னும் மருந்து சிகிச்சையும் கதிரியக்க சிகிச்சையும் வழங்கப்படும். அறுவை சிகிச்சைக்கு ஏற்ற உடல்நிலை நோயாளிக்கு இல்லையென்றால், மருந்து சிகிச்சையும் கதிரியக்க சிகிச்சையும் தரப்படுவதுண்டு.

நோய் மூன்றாம் கட்டத்தில் இருக்கிறது என்றால், மருந்து சிகிச்சையையும் கதிரியக்க சிகிச்சையையும் கொடுத்து, கட்டியை சுருங்க வைத்த பின்னர் அறுவை சிகிச்சை செய்கிறார்கள். அப்போதும் அறுவை சிகிச்சைக்கு நோயாளியின் உடல் தயாரில்லை என்றால் மருந்து சிகிச்சையையும் கதிரியக்க சிகிச்சையையும் மட்டுமே வழங்குகிறார்கள். நோய் நான்காவது கட்டத்தை எட்டிவிட்டது என்றாலும், அறுவை சிகிச்சையைத் தவிர்த்துவிட்டு, மருந்து சிகிச்சை மற்றும் கதிரியக்க சிகிச்சை மேற்கொள்ளப்படுவது உண்டு. நோயின் இறுதிக்கட்டத்தில், இனி எந்த ஒரு மருத்துவமும் பலன் தராது என்னும் நிலைமையில், பேலியேட்டிவ் கேர்(Palliative care) எனும் பாதுகாப்பு சிகிச்சையில் நோயாளி இருக்க வேண்டும். இதில் நோயாளியைச் சிரமப்படுத்தும் வலி, வாந்தி, உணவு சாப்பிட முடியாதது போன்ற பிரச்னைகளுக்கு ஏற்றபடி சிகிச்சை தரப்படும்.

புற்றுநோய்க்கான மருந்து சிகிச்சையில் தற்போது ‘இம்யூனோதெரபி’ சிகிச்சையும் ‘இலக்குசார் சிகிச்சை’யும் (Targeted treatment) கதிர்வீச்சு சிகிச்சையில் சைபர் நைஃப், ‘ட்ரூ பீம்’ சிகிச்சைகளும் முக்கிய இடம் பிடித்துள்ளன. இவை பழைய சிகிச்சைமுறைகளில் ஏற்படுகின்ற வாய்ப்புண், அல்சர், குமட்டல், வாந்தி, சாப்பிட முடியாத நிலைமை, முடி கொட்டுதல் போன்ற பல பக்கவிளைவுகளைக் குறைப்பதோடு, சிகிச்சைக்கான காலத்தையும் குறைத்துவிடுகின்றன. அடுத்ததாக புற்றுநோய் சிகிச்சையில் தொடர்கவனிப்பு என்பது மிகவும் முக்கியம். மருத்துவரின் ஆலோசனைப்படி குறிப்பிட்ட இடைவெளிகளில் மருத்துவப் பரிசோதனைகளும் உடல் பரிசோதனைகளும் செய்துகொண்டால்தான் நோயைக் கட்டுப்படுத்துவதும் குணப்படுத்துவதும் மறுபடியும் அது வருவதைத் தடுப்பதும் கைகூடும்.

தடுப்பது எப்படி?

புகைப்பழக்கத்தை எல்லா வழிகளிலும் விட்டொழிப்பது ஒன்றுதான் நுரையீரல் புற்றுநோய் வராமல் தடுக்கும் முக்கிய வழி. இறைச்சி அதிகமில்லாமல், காய்கறி மிகுந்த உணவுப் பழக்கத்தை மேற்கொள்ள வேண்டும். தொழில் சார்ந்த நுரையீரல் புற்றுநோய் வர வாய்ப்பு உள்ளவர்கள் அந்தந்தத் தொழிலுக்கு ஏற்ற தடுப்புக் கவசங்களை அணிந்துகொண்டு பணி புரிவது நல்லது.

நுரையீரல் புற்றுநோய் ஸ்கிரீனிங்!

வம்சாவளியில் புற்றுநோய் வந்திருப்பவர்களும், புகைப்பழக்கம் உள்ளவர்களும், நுரையீரல் புற்றுநோய் வர வாய்ப்புள்ள வேலைகளில் உள்ளவர்களும் ஆண்டுக்கு ஒருமுறை குறை அளவு சி.டி. ஸ்கேன்(Low dose CT scan) பரிசோதனை செய்துகொண்டால், அறிகுறிகள் தெரியாத ஆரம்ப கட்டத்திலேயே நோயைக் கண்டுபிடித்துவிட முடியும். அவ்வாறு கண்டுபிடிக்கப்படும் நோயாளிகளுக்கு நுரையீரல் புற்றுநோய் முழுவதுமாக குணமாவதற்கு 80% வாய்ப்புள்ளது என்பது ஆறுதல் தரும் செய்தி. (படைப்போம்)

கேன்சரை ‘விளாசிய’ யுவராஜ்சிங்!

இந்திய கிரிக்கெட் வீரர் யுவராஜ்சிங்கை மறந்திருக்க மாட்டீர்கள். யுவராஜ் சிங் 2011 உலகக்கோப்பையை வென்ற இந்திய அணியில் பெரும் பங்காற்றினார். அந்தத் தொடரில் மட்டும் அவர் 362 ரன்கள் எடுத்தார்; 15 விக்கெட்டுகளை வீழ்த்தினார். தொடர் நாயகன் விருதையும் வென்றார். அப்போது ஒருமுறை அவர் ரத்த வாந்தி எடுத்தார். அவருக்கு நெஞ்சுப் பகுதியில் புற்றுநோய்(Mediastinal cancer) வந்திருப்பதை மருத்துவர்கள் கண்டறிந்து எச்சரித்தனர். ஆனாலும், விளையாட்டில் இருந்த ஆர்வத்தால் அந்த எச்சரிக்கையைப் புறக்கணித்துவிட்டு, மேற்கிந்தியத் தீவுகள் அணிக்கு எதிராக விளையாடச் சென்றுவிட்டார். அவருக்குப் புகைப்பழக்கமோ, மதுப்பழக்கமோ இல்லை. அதனால் தனக்கு புற்றுநோய் வர வாய்ப்பில்லை என்று நம்பினார். ஆனால், அவருக்கு மரபியல் ரீதியாக கேன்சர் வந்திருந்தது பின்னர் தெரிந்தது.

தனக்கு இந்த மாதிரி நோயெல்லாம் வராது என்று தாமாகவே நினைத்துக்கொண்டு மருத்துவர்களின் ஆலோசனைகளைப் புறக்கணிப்பது தவறு என்பதற்கு யுவராஜ்சிங் ஓர் உதாரணமாகிவிட்டார். தனக்குள் பரவிவிட்ட புற்றுநோய்க்கு அமெரிக்காவில் சிகிச்சை பெற்றுத் திரும்பினார். ஒரு பேட்டியில் அவர், ‘உலகக்கோப்பை வெற்றியின் உச்சத்துக்கு பின் எனக்கு புற்றுநோய் இருப்பது தெரிய வந்தது அது பெறும் அதிர்ச்சியைத் தந்தது. என் மகிழ்ச்சி அனைத்தையும் அது எடுத்துக் கொண்டது. என் வாழ்வின் இருண்ட பகுதி அது. என்றாலும், மனவலிமையோடு அதை எதிர்கொண்டேன். கேன்சரிலிருந்து விடுதலை பெற்றேன்’ என்றார். புற்றுநோயில் இருந்து மீண்ட யுவராஜ் சிங் மறுபடியும் கிரிக்கெட் ஆடினார். புற்றுநோயால் பாதிக்கப்பட்டவர்களுக்கு உதவ You we can என்னும் தன்னார்வத் தொண்டு நிறுவனத்தை நிறுவினார். அவருடைய வாழ்க்கையில் அது இரண்டாவது இன்னிங்ஸ்!

Tags :
× RELATED அரசு மருத்துவமனையில் நுரையீரல்...