கொரோனா விதிமுறைகள் மீறல் சென்னையில் 5,666 பேருக்கு அபராதம்: காவல் துறை அதிரடி நடவடிக்கை

சென்னை: முகக்கவசம் மற்றும் சமூக இடைவெளியை கடைப்பிடிக்காமல் வெளியே சுற்றியதாக சென்னை முழுவதும் ஒரே நாளில் 5,666 பேரிடம் ₹11.33 லட்சம் அபராதம் தொகையை போலீசார் வசூலித்துள்ளனர். கொரோனா மற்றும் ஒமிக்ரான் தொற்று அதிவேகமாக பரவி வருகிறது. இதனால் சென்னை மாநகர காவல் எல்லையில் சமூக இடைவெளி மற்றும் முகக்கவசம் அணியாமல் வெளியே சுற்றும் நபர்கள் மீது போலீசார் உதவியுடன் வழக்கு பதிவு செய்து அபராதம் விதிக்கப்படும் என்று சென்னை மாநகராட்சி அறிவித்தது.அதைதொடர்ந்து போலீஸ் கமிஷனர் சங்கர் ஜிவால் உத்தரவுப்படி சென்னை மாநகராட்சி அதிகாரிகளுடன் இணைந்து மாநகர போலீசார் ‘சிறப்பு முகக்கசவம் அமலாக்க குழு’ ஒன்று அமைக்கப்பட்டுள்ளது. இந்த குழு சென்னையில் பொதுமக்கள் அதிகம் கூடும் இடங்களான மார்ககெட், கடற்கரை பகுதிகள், கடை வீதிகள், பூங்காக்கள், பேருந்து நிலையங்கள், வணிக வளாகங்கள் மற்றும் திருமண மண்டபங்கள் ஆகிய இடங்களில் தீவிரமாக கண்காணித்து தமிழக அரசின் கொரோனா தடுப்பு வழிகாட்டுதல் நெறிமுறைகளை கடைப்பிடிக்காத நபர்கள் மீது வழக்கு பதிவு செய்து அபராதம் வசூலித்து வருகின்றனர்.

அந்த வகையில், நேற்று முன்தினம் இரவு முதல் நேற்று அதிகாலை வரை ஒரே நாளில் 95 நபர்கள் மீது வழக்கு பதிவு செய்யப்பட்டது. மேலும், முகக்கவசம் அணியாமல் வெளியே சுற்றியதாக 5,666 பேர் மீது வழக்கு பதிவு செய்து அபராதமாக 11 லட்சத்து 33 ஆயிரத்து 200 ரூபாய் வசூலித்துள்ளனர். அதேபோல் சமூக இடைவெளி கடைப்பிடிக்காமல் சுற்றியதாக 22 பேரிடம் அபராதமாக ₹11 ஆயிரம் வசூலித்துள்ளனர். மேலும், குடிபோதையில் வாகனம் ஓட்டியதாக 2 பேர் மீது வழக்கு பதிவு செய்யப்பட்டுள்ளது. மேலும், விதிகளை மீறியதாக 175 பைக்குகள், 9 ஆட்டோக்கள் உட்பட மொத்தம் 185 வாகனங்களை போலீசார் பறிமுதல் செய்துள்ளனர். இந்த நடவடிக்கை தொடரும் என்றும் போலீசார் தெரிவித்துள்ளனர்.

Related Stories: