திருமலை :  ஆந்திராவில் கருப்பு பேப்பர்களை ரசாயனத்தில் கழுவினால் ரூபாய் நோட்டுகளாக மாறிவிடும் எனக்கூறி மோசடி செய்ய முயன்ற 3 பேரை போலீசார் கைது செய்தனர்.

ஆந்திர மாநிலம், அனந்தபூர் மாவட்டத்தில் உள்ள குந்தக்கல் டிஎஸ்பி நரசிம்மன் நேற்று நிருபர்களிடம் கூறியதாவது: அனந்தபூர் மாவட்ட எஸ்பி பகீரப்பாவிற்கு கிடைத்த ரகசிய தகவலின்பேரில், நேற்று முன்தினம் போலீசார் பல்வேறு இடங்களில் வாகன சோதனையில் ஈடுபட்டனர்.

அப்போது, குந்தக்கல் ரயில் நிலையம் அருகே சந்தேகத்திற்கிடமாக காரில் சுற்றிய நரேஷ்குமார், துரைசாமி, கோபாலகிருஷ்ணா ஆகிய 3 பேரை போலீசார் பிடித்து விசாரணை நடத்தினர்.

இதில், கோவாவில் உள்ள ரிசர்வ் வங்கியில் இருந்து கருப்பு நோட்டு கட்டுகள் கொண்டு வந்துள்ளதாகவும், அசல் ரூபாய் நோட்டுகளை வழங்கினால் அதற்கு 3 மடங்கு கருப்பு நோட்டுகள் வழங்குவதாகவும், ரசாயனத்தில் கழுவினால் அசல் நோட்டாக மாறிவிடும் என கூறி மோசடியில் ஈடுபட்டது தெரியவந்தது.

இதையடுத்து 3 பேரையும் கைது செய்து, அவர்களிடமிருந்து மோசடியில் ஈடுபட வைத்திருந்த கருப்பு பேப்பர்கள், 3 செல்போன், ₹3 லட்சத்து 20 ஆயிரம் ரொக்கம் மற்றும் கார் பறிமுதல் செய்யப்பட்டது. இவர்கள் ஆரம்பத்திலேயே கைது செய்யப்பட்டதால் மோசடி தடுக்கப்பட்டது.  இல்லாவிட்டால் இவர்களின் வலையில் பலர் ஏமாந்து இருப்பார்கள். எனவே, பொதுமக்கள் இதுபோன்ற கும்பலிடம் எச்சரிக்கையாக இருக்க வேண்டும்.இவ்வாறு, அவர் கூறினார்.