சென்னை: தமிழக டிஜிபி சைலேந்திர பாபு அனுப்பியுள் சுற்றறிக்கை: அரசு ஊழியர்கள் மற்றும் அவர்களது தகுதியான குடும்ப உறுப்பினர்களுக்கு பணச்செலவில்லா மருத்துவ வசதியை வழங்கும் பொருட்டு, ஏற்கனவே அரசால் நடைமுறைப் படுத்தப்பட்டு வந்த புதிய மருத்துவ காப்பீட்டு திட்டம்-2016ம், கடந்த ஜூன் 30ம் தேதி உடன் முடிவடைந்ததை தொடர்ந்து, ‘புதிய மருத்துவக் காப்பீட்டுத் திட்டம்- 2021’ அமல்படுத்தப்பட்டு யுனைடெட் இந்தியா காப்பீட்டு நிறுவனத்தால் நடைமுறைப்படுத்தப்பட்டுள்ளது. புதிய மருத்துவ காப்பீட்டு திட்டம் 2021ல் உள்ள காப்பீட்டு விவரங்கள் மற்றும் வசதிகள்: மருத்துவ காப்பீட்டு வசதியானது கடந்த ஜூலை 1ம் தேதி முதல் 2025ம் ஆண்டு ஜூன் 30ம் தேதி வரையிலான 4 வருட தொகுப்பு ஆண்டிற்கு வழங்கப்படும். 203 நோய்களுக்கான சிகிச்சை மற்றும் அறுவை சிகிச்சைகளுக்கு அதிகபட்சமாக ரூ.5 லட்சம் வரை வழங்கப்படும். 7 வகையான நோய்களுக்கான சிகிச்சை மற்றும் அறுவை சிகிச்சைகளுக்கு அதிக பட்சமாக ரூ.10 லட்சம் வரை வழங்கப்படும்.