சென்னை: தேங்காய் எண்ணெய்க்கு 18 சதவீதம் ஜி.எஸ்.டி. வரி விதிக்கப்பட்டிருப்பது தென்னை சாகுபடி அதிகம் உள்ள தென் மாநிலங்களுக்கு எதிரான நடவடிக்கை என்று தமிழ்நாடு அரசு கடும் எதிர்ப்பினை தெரிவித்துள்ளது. இதுகுறித்து நிதியமைச்சர் பழனிவேல் தியாகராஜன் ஜி.எஸ்.டி. கவுன்சிலுக்கு அனுப்பியிருக்கும் அறிக்கையில், தேங்காய் எண்ணெய் ஒரு லிட்டருக்கும் குறைவாக விற்பனை செய்யும் போது அது கூந்தல் எண்ணெய் என்று பட்டியலிடப்பட்டு 18 சதவீதம் வரி விதிக்க பரிந்துரை செய்யப்பட்டிருப்பதை சுட்டிக்காட்டியுள்ளார். மேலும் ஒரு லிட்டர் மற்றும் அதற்கு மேல் விற்பனை செய்யப்படும் போது மட்டுமே தேங்காய் எண்ணெய்க்கு 5 சதவீத வரி பொருந்தும் என கூறப்பட்டுள்ளது ஏழை, எளிய மக்களை பெரிதும் பாதிக்கும் என்றும் அவர் கூறியிருக்கிறார்.