சென்னை: நீர்வளத்துறை அமைச்சர் துரைமுருகன் நிருபர்களிடம் கூறியதாவது:முன்னாள் முதல்வர் ஜெயலலிதா பட திறப்பு விழாவில் திமுக கலந்து கொள்ளவில்லை. எனவே, தலைவர் கலைஞர் பட திறப்பு விழாவை புறக்கணிப்பதாக எதிர்க்கட்சியினர் கூறுகிறார்கள். ஜெயலலிதா பட திறப்பு விழாவுக்கு எங்களுக்கு அழைப்பு மட்டுமே அனுப்பி வைத்தார்கள். ஆனால், நாங்கள் அப்படி இல்லை. இந்த விழாவை நடத்த திட்டமிட்டபோதே தலைவர் ஸ்டாலின் என்னை அழைத்து எதிர்க்கட்சிகளின் தோழமையோடு நடக்க வேண்டும். எனவே, எதிர்க்கட்சி தலைவர் எடப்பாடியை தொடர்பு கொண்டு, அவர் இந்த விழாவில் கலந்து கொள்ள வேண்டும். குடியரசு தலைவர், ஆளுநர் அமரும் வரிசையில் அவருக்கு ஒரு இடம் ஒதுக்கப்படும். அவர் வாழ்த்துரை வழங்க வேண்டும் என்று என்னிடம் முதல்வர் மு.க.ஸ்டாலின் கூறினார். நானும் தொலைப்பேசியில் எதிர்க்கட்சி தலைவரை தொடர்பு கொண்டேன். அப்போது, நீங்கள் விழாவிற்கு வர வேண்டும் என்று முதல்வர் விரும்புகிறார். நீங்கள் வர வேண்டும். அந்த விழாவில் கலந்து கொண்டு வாழ்த்துரை வழங்க வேண்டும் என்று கூறினேன்.