ஒலிம்பிக் ஆண்கள் டென்னிஸ் ஒற்றையர் பிரிவில் ஜெர்மனி வீரர் அலெக்சாண்டர் ஸ்வெரவ் (24 வயது) தங்கப் பதக்கம் வென்றார். இறுதிப் போட்டியில் ரஷ்ய ஒலிம்பிக் கமிட்டி அணி (ஆர்.ஓ.சி) வீரர் கரென் கச்சனோவுடன் நேற்று மோதிய அலெக்சாண்டர் 6-3, 6-1 என்ற நேர் செட்களில் மிக எளிதாக வென்று சாம்பியன் பட்டத்தை கைப்பற்றினார். கச்சனோவ் (25 வயது) வெள்ளிப் பதக்கத்துடன் திருப்தி அடைந்தார். மகளிர் இரட்டையர் பிரிவு பைனலில் செக் குடியரசின் கிரெஜ்சிகோவா - சினியகோவா ஜோடி 7-5, 6-1 என்ற நேர் செட்களில் சுவிட்சர்லாந்தின் பெலிண்டா பென்சிக் - விக்டோரியா கொலுபிக் ஜோடியை வீழ்த்து தங்கப் பதக்கத்தை முத்தமிட்டது. கலப்பு இரட்டையர் பிரிவில் ரஷ்ய ஒலிம்பிக் கமிட்டி அணியின் எலினா வெஸ்னினா - அஸ்லன் கரட்சேவ் மற்றும் அனஸ்டேசியா பாவ்லியுசென்கோவா - ஆந்த்ரே ருப்ல்வேவ் ஜோடிகள் மோதின. மிகவும் விறுவிறுப்பாக அமைந்த இப்போட்டியில் அனஸ்டேசியா - ருப்லேவ் இணை 6-3, 6-7 (5-7), 13-11 என்ற செட் கணக்கில் 1 மணி, 53 நிமிடம் போராடி வென்று முதலிடம் பிடித்தது. வெஸ்னினா - கட்சேவ் வெள்ளிப் பதக்கம் பெற்றனர்.