திருவனந்தபுரம்: ‘கேரளாவில் பாஜ.வின் முதல்வர் வேட்பாளராக, ‘மேட்ரோமேன்’ என அழைக்கப்படும் ஸ்ரீதரன் நிறுத்தப்படுகிறார்,’ என இம்மாநில பாஜ தலைவர் சுரேந்திரன் கூறியுள்ளார். கேரளாவை சேர்ந்தவர் ஸ்ரீதரன். இந்தியாவில் நிறைவேற்றப்பட்டுள்ள மெட்ரோ ரயில் திட்டங்களுக்கு மூளையாக செயல்பட்டவர். தற்போது இவருக்கு 83 வயது. மெட்ரோ ரயில் நிறுவனத்தின் தலைவர் பதவியில் இருந்து ஓய்வு பெற்ற பிறகு, கேரளாவில் வசித்து வருகிறார். சில தினங்களுக்கு முன்பாக இவர் பாஜ.வில் இணைந்தார். அப்போது, கேரளாவில் பாஜ.வின் முதல்வர் வேட்பாளராக போட்டியிட விரும்புவதாக தெரிவித்தார். இது, பெரும் பரபரப்பை ஏற்படுத்தியது. இம்மாநிலத்தில் பாஜ.வின் முதல்வர் வேட்பாளராக பலர் போட்டி போட்டு வரும் சூழ்நிலையில், ஸ்ரீதரனின் முதல்வர் ஆசை குறித்து பாஜ சார்பில் இதுவரை யாரும் எந்தக் கருத்தும் தெரிவிக்காமல் இருந்தனர்.