சென்னை: திமுக தலைவர் மு.க.ஸ்டாலின் பிறந்தநாள் விழாவை ஒட்டி சென்னை அண்ணா சாலையில் உள்ள மாற்றுத் திறனாளி மாணவர்களுக்கு மு.க.ஸ்டாலின் மதிய உணவு வழங்கினார். திமுக தலைவர் மு.க.ஸ்டாலின் இன்று தனது 68ஆவது பிறந்தநாளை கொண்டாடுகிறார். பிறந்த நாளை முன்னிட்டு அவருக்கு கட்சி பிரமுகர்கள், ராகுல் காந்தி, கமல் உள்ளிட்டோர் வாழ்த்துக்களை தெரிவித்து வருகின்றனர். மேலும், திமுக எம்.பி.கனிமொழி, திமுக எம்.பி. தயாநிதி மாறன், மக்கள் நீதி மய்ய தலைவர் கமல்ஹாசன், திருமாவளவன் உள்ளிட்ட பலரும் தங்களது இதயம் கனிந்த வாழ்த்துக்களை தெரிவித்து வருகின்றனர். இதனிடையே சென்னை அண்ணா சாலையில் உள்ள சிறப்பு பள்ளியில் தனது பிறந்தநாளை திமுக தலைவர் மு.க.ஸ்டாலின் கொண்டாடினார்.