பெங்களூரு: மேக் இன் இந்தியா திட்டத்தின் கீழ் உள்நாட்டில் பல்வேறு பொருட்கள் தயாரிக்கப்படுகின்றன. அவ்வாறு தயாரிக்கப்பட்ட பொருட்கள் மட்டுமே போலீஸ் கேன்டீனில் வழங்கப்படும் என்று மத்திய உள்துறை அமைச்சர் அமித்ஷா தெரிவித்தார். பத்ராவதியில் இருந்து பெங்களூரு திரும்பிய அமித்ஷா விதானசவுதா வரவேற்பு அரங்கில் போலீஸ் துறை சார்பில் அமைக்கப்பட்டிருந்த கண்காட்சியை தொடங்கி வைத்தார். இதைத்தொடர்ந்து நேற்று இரவு 8.30 மணி அளவில் தனியார் நட்சத்திர ஓட்டலில் நடந்த பாஜ ஒருங்கிணைப்பு கூட்டத்தில் மத்திய உள்துறை அமைச்சர் அமித்ஷா கலந்து கொண்டார். இக்கூட்டத்தில் முதல்வர் எடியூரப்பா, அமைச்சர்கள் உள்ளிட்ட பலர் கலந்து கொண்டனர். அமைச்சர் பதவி கிடைக்காத நிலையில் பாஜவில் அதிருப்தி எம்எல்ஏக்கள் குறித்து இக்கூட்டத்தில் அமித்ஷாவிடம் முதல்வர் எடியூரப்பா ஆலோசனை நடத்தியதாக தகவல் வெளியாகியுள்ளன. அத்துடன் பெலகாவி தொகுதி எம்பி இடைத்தேர்தல், பசவகல்யாண் மற்றும் மஸ்கி ஆகிய இரண்டு தொகுதிகளில் வேட்பாளர்கள் வெற்றிக்கான வியூகமும் இதில் விவாதிக்கப்பட்டுள்ளது.