புதுடெல்லி: ‘கொரோனா வைரஸ், ஜிஎஸ்டி உள்ளிட்ட விவகாரங்கள் எதிர்காலத்தில் ஹார்வர்டு பிசினஸ் ஸ்கூலின் ஆய்வாக இருக்கும்’ என காங்கிரஸ் முன்னாள் தலைவர் ராகுல்காந்தி விமர்சித்துள்ளார். காங்கிரஸ் முன்னாள் தலைவர் ராகுல்காந்தி நேற்று தனது டிவிட்டர் பதிவில், “எதிர்காலத்தில் கொரோனா தொற்று, பணமதிப்பிழப்பு, ஜிஎஸ்டி அமல்படுத்துவது உள்ளிட்டவற்றிலான தோல்வியானது ஹார்வர்டு வர்த்தக பள்ளியின் ஆய்வாக இருக்கலாம்” என குறிப்பிட்டுள்ளார். மேலும் கொரோனா நோய் தொற்றின்போது நாட்டு மக்களுக்கு உரையாற்றிய பிரதமர் மோடி மகாபாரத போர் 18 நாட்கள் நடந்தது. கொரோனாவுக்கு எதிரான போரில் வெற்றி பெறுவதற்கு 21 நாட்கள் ஆகும் என்று கூறியிருந்த வீடியோ காட்சியையும் ராகுல் இணைத்துள்ளார்.