ஐதராபாத்:  தெலங்கானாவில் பயணிகளுடன் நின்றிருந்த அரசு பேருந்தை போதை ஆசாமி ஓட்டிச் சென்ற சம்பவம் பரபரப்பை ஏற்படுத்தி உள்ளது. தெலங்கானா மாநிலம், விகாராபாத்தில் டிப்போவில் இருந்து காரம்கோட் செல்வதற்காக நேற்று முன்தினம் இரவு அரசு பேருந்து ஒன்று நிறுத்தப்பட்டு இருந்தது. கடைசி பேருந்து என்பதால் அதில் 15 பயணிகள் மட்டுமே இருந்தனர். அதன் டிரைவர் மற்றும் கண்டக்டர்  இரவு உணவு சாப்பிடுவதற்காக பேருந்தை நிறுத்திவிட்டு சென்றிருந்தனர். அப்போது போதை ஆசாமி ஒருவர் பேருந்தில் ஏறி அதனை ஓட்ட ஆரம்பித்தார். இதனால் பேருந்தில் இருந்த பயணிகள் சந்தேகம் அடைந்தனர். கண்டக்டர் இல்லையா என கேட்டபோது  நானே பணத்தை வாங்கி கொண்டு டிக்கெட்டை தருகிறேன் என கூறியுள்ளார். இது தொடர்பாக பயணிகளுக்கும் போதை ஆசாமிக்கும் இடையே வாக்குவாதம் முற்றிய நிலையில் அந்த நபர் பேருந்தை நடுரோட்டில் நிறுத்திவிட்டு சென்றுவிட்டதாக தெரிகிறது.

இதுகுறித்து பேருந்து பயணி ஒருவர் கொடுத்த தகவலின்பேரில் அங்கு அரசு போக்குவரத்து கழக அதிகாரிகள் மற்றும் போலீசார் விரைந்தனர். பேருந்து பயணி ஒருவர் கூறுகையில், ‘‘போதை ஆசாமி நீண்ட நேரம் தான் செல்ல வேண்டிய இடத்துக்கான பஸ் வருமா, வராதா என்று பலரிடம் கேட்டுக் கொண்டிருந்தார். பின்னர் திடீரென அவர் பயணிகளுடன் நின்றிருந்த பேருந்தை எடுத்து சென்றுவிட்டார்’’ என்றார்.ஆனால், பேருந்தை எடுத்து வந்த போதை ஆசாமி, திருடுவதற்காக அதை ஓட்டிச்சென்றாரா அல்லது பயணிகளுடன் கட்டணத்தை வசூலித்துக் கொண்டு தப்பியோட முயன்றாரா என்பது குறித்து விசாரித்து வருகின்றனர்.