புதுடெல்லி: சேலம் - சென்னை இடையிலான எட்டு வழிச்சாலை திட்டம் தொடர்பான வழக்கை விரைந்து விசாரிக்க வேண்டும் என்ற மத்திய அரசின் கோரிக்கையை உச்ச நீதிமன்றம் நேற்று நிராகரித்தது. சென்னை - சேலம் இடையில் உருவாக்க திட்டமிடப்பட்டு இருக்கும் 8 வழிச்சாலை திட்டத்திற்கு விவசாயிகள் மற்றும் பொதுமக்கள் கடும் எதிர்ப்பு தெரிவித்து வருகின்றனர். இதையடுத்து திட்டத்திற்கு எதிராக தொடரப்பட்ட வழக்கை விசாரித்த உயர் நீதிமன்றம், அதுதொடர்பான அறிவிப்பு மற்றும் அரசாணை ஆகியவற்றை ரத்து செய்தது. இதையடுத்து உயர் நீதிமன்ற உத்தரவிற்கு எதிராக மத்திய அரசு தரப்பில் உச்ச நீதிமன்றத்தில் மேல்முறையீட்டு மனு தாக்கல் செய்யப்பட்டது. வழக்கை விசாரித்த நீதிமன்றம், இந்த விவகாரத்தில் மனுதாரர் மற்றும் எதிர்மனுதாரர் அனைவரும் இரண்டு வாரத்தில் பதில் மனு தாக்கல் செய்ய வேண்டும் என கடந்த வாரம் உத்தரவிட்டிருந்தது.