குன்னூர்: குன்னூர் பகுதியில் இருந்து 25 கி.மீ. தொலைவில் உலிக்கல் பஞ்சாயத்திற்குட்பட்ட ஆனைப்பள்ளம், சடையன் கொம்பை, சின்னாலக்கொம்பை ஆகிய பழங்குடியினர் கிராமங்கள் உள்ளது. அடர்ந்த வனப்பகுதியின் மத்தியில் அமைந்துள்ள இந்த கிராமங்களில் குறும்பர் பழங்குடியின மக்கள் வசிக்கின்றனர். கடந்த 40 ஆண்டுகால போராட்டத்திற்கு பின்பு இந்த பகுதியில் சாலையை சீரமைக்க 1.50 கோடி ரூபாய் நிதி ஒதுக்கீடு செய்யப்பட்டு சாலை அமைக்கும் பணி நடைபெற்று வந்தது. இந்த நிலையில் தொடர்ந்து பெய்த கனமழையால் சாலை முழுமையாக அடித்து செல்லப்பட்டது. மேலும், பல இடங்களில் மண் சரிவு மற்றும் பாறைகள் விழுந்ததால் சாலையை பயன்படுத்த முடியாத நிலை ஏற்பட்டுள்ளது. இதனால் சுற்றியுள்ள பழங்குடியின கிராம மக்கள் தங்களது குழந்தைகளை பள்ளிக்கு அனுப்ப முடியாமலும், மேலும், நோயாளிகள் மற்றும் கர்ப்பிணி பெண்களை 6 கி.மீ. தொலைவு வரை சுமந்து செல்ல வேண்டிய அவலம் ஏற்பட்டுள்ளது.