கிருஷ்ணகிரி: கிருஷ்ணகிரி மாவட்டம் பர்கூர் ஒன்றியம் அஞ்சூர் அருகே நாயக்கனூர் கிராமத்தை சேர்ந்தவர் ரவி(29). லாரி டிரைவர். இவரது மனைவி காயத்ரி(25). இவர்களுக்கு ஏற்கனவே 3 பெண் குழந்தைகளும், ஒரு ஆண் குழந்தையும் இருந்தது. இதில் ஒரு பெண், ஒரு ஆண் குழந்தை இறந்துவிட்டது. இந்நிலையில் காயத்ரி மீண்டும் கர்ப்பமானார். நிறை மாத கர்ப்பிணியாக இருந்த அவருக்கு கடந்த 5ம் தேதி கிருஷ்ணகிரி அரசு தலைமை மருத்துவமனையில் பெண் குழந்தை பிறந்தது. இதையடுத்து பச்சிளங்குழந்தையுடன் காயத்ரி, மருத்துவமனையில் தாய்மார்களுக்கான வார்டில் இருந்தார். நேற்று மதியம் காயத்ரியை பார்க்க அவரது மாமியார் மற்றும் குழந்தைகள் வந்தனர். இதையடுத்து குழந்தையை படுக்கையில் படுக்க வைத்து விட்டு காயத்ரி கீழே சென்றார். அவர்களை அனுப்பிவிட்டு மீண்டும் மேலே வந்து பார்த்தார். அப்போது படுக்கையில் இருந்த குழந்தை மாயமாகி இருந்தது.