கோபி: தடை செய்யப்பட்ட ‘பிட்காயின்’ எனப்படும் பணமில்லா பரிவர்த்தனை மூலம்  இந்தியா முழுவதும் பணம் வசூலித்து ₹2 ஆயிரம் கோடி மோசடியில் ஈடுபட்ட உடுமலையை சேர்ந்த தம்பதி உட்பட 5 பேர் மீது கோபி போலீசில் புகார் அளித்துள்ளனர்.

பல்வேறு நாடுகளில் பிட்காயின் (கிரிப்டோ கரன்சி) எனப்படும் பணமில்லா பரிவர்த்தனை நடந்து வந்தாலும், இந்திய அரசு இந்த பிட்காயின் முறைக்கு தடை விதித்துள்ளது. ஆனால், அதையும்மீறி ஒரு மோசடி திருப்பூரில் நடந்துள்ளது. திருப்பூர் மாவட்டம், உடுமலையை சேர்ந்தவர் ராஜதுரை. இவரது மனைவி ஸ்வேதா, நண்பர் வேலுச்சாமி, மதுரையை சேர்ந்த ராஜ்குமார், திருச்சியை சேர்ந்த குட்டி மணி ஆகியோர் கடந்த மார்ச் மாதம் ஈரோடு மாவட்டம் கோபியை சேர்ந்த கங்காதரன் என்பவரை சந்தித்து ஆன்லைன் மூலம் வீட்டு உபயோக பொருட்கள் விற்பனை செய்வதாகவும், அதில் 2.80 லட்சம் முதலீடு செய்தால் மாதம்தோறும் ₹20 ஆயிரம் வரை கமிஷன் கொடுப்பதாகவும் கூறி உள்ளனர்.

இதை நம்பிய கங்காதரன் அவர்களிடம் ₹2.80 லட்சம் கொடுத்துள்ளார். முதல் நான்கு மாதங்கள் கமிஷன் தொகை கொடுத்தவர்கள் அதன்பின்னர் தரவில்லை. இதுகுறித்து கங்காதரன் கேட்டபோது, காலதாமதம் செய்து வந்துள்ளனர். இதனால் கங்காதரன் நிறுவனம் குறித்து விசாரித்தபோது பெயரளவுக்கு ஆன்லைன் மூலம் வீட்டு உபயோக பொருட்கள் விற்பனை செய்வது போன்ற தோற்றத்தை உருவாக்கி, முதலீட்டாளர்களிடம் பெற்ற பணத்தை அரசால் தடை செய்யப்பட்ட ‘பிட்காயின்’ எனப்படும் பணமில்லா பரிவர்த்தனையில் முதலீடு செய்து அரசை ஏமாற்றியது தெரியவந்தது. இதனால் அதிர்ச்சியடைந்த கங்காதரன் கொடுத்த பணத்தை திரும்ப கேட்டார். ஆனால் ராஜதுரை உட்பட 5 பேரும் கங்காதரனுக்கு கொலை மிரட்டல் விடுத்துள்ளனர். அதைத்தொடர்ந்து கங்காதரன் மற்றும் முதலீட்டாளர்கள் சுமார் 20 பேர் கோபி காவல் நிலையத்தில் 5 பேர் மீதும் நேற்று புகார் அளித்தனர். இதுகுறித்து கங்காதரன் கூறுகையில், ‘ராஜதுரை உள்ளிட்ட 5 பேரும் போலியான வெப்சைட் உருவாக்கி, இந்தியா முழுவதும் சுமார் 2 ஆயிரம் முகவர்களை நியமித்து சுமார் 2 ஆயிரம் கோடி ரூபாய் வரை வசூல் செய்து இந்திய அரசால் தடை செய்யப்பட்ட பிட்காயின் (கிரிப்டோ கரன்சி) எனப்படும் பணமில்லா பரிவர்த்தனை மூலம் முதலீட்டாளர்களை ஏமாற்றி உள்ளனர். அவர்களை உடனடியாக கைது செய்து நடவடிக்கை எடுக்க வேண்டும்’ என்றார்.