அடிலெய்டு: பாகிஸ்தான் அணியுடனான 2வது டெஸ்டில் (பகல்/இரவு), இன்னிங்ஸ் மற்றும் 48 ரன் வித்தியாசத்தில் அபாரமாக வென்ற ஆஸ்திரேலியா 2-0 என்ற கணக்கில் தொடரை கைப்பற்றியது.அடிலெய்டு ஓவல் மைதானத்தில் நடந்த இப்போட்டியில், டாசில் வென்று பேட் செய்த ஆஸ்திரேலியா 3 விக்கெட் இழப்புக்கு 589 ரன் குவித்து முதல் இன்னிங்சை டிக்ளேர் செய்தது. அடுத்து களமிறங்கிய பாகிஸ்தான் அணி முதல் இன்னிங்சில் 302 ரன்னுக்கு சுருண்டு பாலோ ஆன் பெற்றது. 2வது இன்னிங்சை தொடர்ந்து விளையாடிய அந்த அணி 3ம் நாள் ஆட்ட முடிவில் 3 விக்கெட் இழப்புக்கு 39 ரன் எடுத்திருந்தது. ஷான் மசூத் 14, ஆசாத் ஷபிக் 8 ரன்னுடன் நேற்று 4ம் நாள் ஆட்டத்தை தொடங்கினர். பொறுப்புடன் விளையாடிய இருவரும் அரை சதம் அடித்தனர். 4வது விக்கெட்டுக்கு இந்த ஜோடி 103 ரன் சேர்த்தது. ஷான் மசூத் 68 ரன் (127 பந்து, 8 பவுண்டரி, 1 சிக்சர்), ஆசாத் ஷபிக் 57 ரன் (112 பந்து, 5 பவுண்டரி) விளாசி பெவிலியன் திரும்பினர்.