நெல்லை: நெல்லை டவுன் எண்ணாயிரம் பிள்ளையார்கோவில் தெருவில் தேங்கிநிற்கும் கழிவுநீரால் தொற்று நோய் பரவும் அபாயம் நிலவுகிறது. நெல்லை மாநகராட்சி சார்பில் அரியநாயகிபுரம் குடிநீர் திட்டப்பணிக்காக நெல்லை டவுன் 44வது வார்டு பகுதியில் குழாய்கள் பதிக்கும் பணி நடந்து வருகிறது. இதையொட்டி கழிவுநீரோடை மாற்று பகுதி வழியாக திருப்பி விடப்பட்டது. இதனிடையே கழிவுநீர் வெளியேற வழியின்றி நெல்லை டவுன் எண்ணாயிரம்பிள்ளை கோவில் தெருவில் தேங்கி நிற்கிறது. நேற்று காலை கழிவுநீர் அதிக அளவில் தேங்கி நின்றதால் அப்பகுதியே சாக்கடை குளமாக மாறியது. துர்நாற்றம் வீசியதால் அப்பகுதி மக்கள் மிகுந்த சிரமத்திற்கு ஆளாகினர். இதனால் தொற்று நோய் பரவும் அபாயம் நிலவுவதாக சமூக ஆர்வலர்கள் குற்றம்சாட்டினர்.