வாஷிங்டன்: அமெரிக்காவில் கப்பல் பயணத்தின் போது கடலில் தவறி விழுந்த மாற்றுத்திறனாளி பெண்ணை உடனிருந்த சுற்றுலாப் பயணிகள் மீட்டெடுக்கும் காட்சியானது வலைத்தளங்களில் தற்போது வைரலாகி வருகிறது. விர்ஜின் தீவுகளில் உள்ள செயின்ட் தாமஸ் தீவு அருகே அண்மையில் சுற்றுலா கப்பல் ஒன்று சென்ற போது நீரோட்டத்தின் போக்குக்கு ஏற்ப திடீரென சரிந்து மீண்டுள்ளது. இதில் நிலை தடுமாறிய கப்பலில் இருந்த மாற்றுத்திறனாளி பெண் ஒருவர் கடலில் தவறி விழுந்தார். இதனை பார்த்த கப்பலில் இருந்த சக சுற்றுலா பயணிகளான ரான்டால்ப் டொனோவன் மற்றும் கஷீஃப் ஹாமில்டன் ஆகியோர் கண்ணிமைக்கும் நேரத்தில் நீரில் குதித்தனர்.