சென்னை: தமிழகத்தில் கடந்த 2018-19ம் ஆண்டில் மின்சாரம் திருடியவர்களிடம் இருந்து சுமார் ₹69 கோடிக்கு மேல் அபராதத்தொகை வசூல் செய்யப்பட்டுள்ளதாக மின்வாரியம் தெரிவித்துள்ளது. தமிழகம் முழுவதும் ஏராளமான வீடு, தொழிற்சாலைகள், கடைகள் உள்ளன. இவர்களில் சிலர் சட்டத்துக்கு புறம்பாக மின்திருட்டுகளில் ஈடுபட்டு வருகின்றனர். மின்திருட்டை தடுக்க முன்னாள் ராணுவ வீரர்கள் கொண்ட குழு, அமலாக்க குழு, புலனாய்வு குழுக்கள் அமைத்து கண்காணிக்கப்பட்டு வருகிறது. இக்குழுக்கள் அவ்வப்போது ஆய்வு நடத்தி விதிகளை மீறி செயல்படுவோர் மீது நடவடிக்கை எடுத்து வருகிறது.