பெங்களூரு: தொழில்நுட்ப கோளாறு காரணமாக நிறுத்தி வைக்கப்பட்ட சந்திராயன்-2 விண்கலம், ஜூலை 21 அல்லது 22ம் தேதி விண்ணில் செலுத்த ஆலோசித்து வருவதாக விஞ்ஞானிகள் தெரிவித்துள்ளனர். நிலவை ஆய்வு செய்வதற்காக சந்திராயன்-1 விண்கலம் கடந்த 2008ம் ஆண்டு, அக்டோபர் 22ம் தேதி விண்ணில் ஏவப்பட்டது. நிலவின் வடதுருவத்தில் தரையிறங்கிய விண்கலம் 312 நாட்கள் நிலவில் ஆய்வு மேற்கொண்டது. இதன் மூலம், நிலவில் தண்ணீர், மெக்னீசியம், அலுமினியம், சிலிக்கான் உள்ளிட்ட தாதுகள் இருப்பது தெரியவந்தது. இதையடுத்து நிலவின் தென்துருவத்தில் ஆய்வு மேற்கொள்வதற்காக சந்திராயன்-2 விண்கலத்தை நிலவிற்கு அனுப்ப இஸ்ரோ திட்டமிட்டது. அதன்படி கடந்த 15ம் தேதி அதிகாலை 2.51 மணிக்கு ஆந்திர மாநிலம் ஹரிகோட்டாவில் இருந்து விண்ணில் அனுப்புவதற்கான ஏற்பாடுகள் செய்யப்பட்டது. அப்போது ஜி.எஸ்.எல்.வி ராக்கெட்டில் எரி பொருட்கள் நிரப்பும்போது தொழில்நுட்ப கோளாறு ஏற்பட்டது. விண்கலம் விண்ணில் ஏவுவதற்கான கவுன்ட் டவுன் தொடங்கியபோது தொழில்நுட்ப கோளாறு கண்டுபிடிக்கப்பட்டது.