தமிழகத்தில் இன்னும் 3 நாட்களுக்கு 13 மாவட்டத்தில் வெப்ப காற்று வீசும்: வானிலை ஆய்வு மையம் எச்சரிக்கை

சென்னை: தமிழகத்தில் நிலவும் வறண்ட வானிலை காரணமாக 13 மாவட்டங்களில் வெப்ப காற்று வீசும் என்று சென்னை வானிலை ஆய்வு மையம் தெரிவித்துள்ளது. தமிழகத்தில் கடந்த மாதம் 29ம் தேதியுடன் கத்தரி வெயில் முடிந்தது. அதற்கு பிறகு வெயிலின் அளவு குறையும் என்று எதிர்பார்க்கப்பட்ட நிலையில், வெயிலின் தாக்கம் ஒரே நிலையில் இருந்து வருகிறது. கோடை முடிந்தும் வெயில்  குறையவில்லை என்று மக்கள் புலம்பும் அளவுக்கு வெயில் வாட்டி வதைத்து வருகிறது. இதற்கிடையே,கேரளாவில் தென்மேற்கு பருவமழை தொடங்கி மழை பெய்ய தொடங்கி உள்ளது. ஆனால் சமீபத்தில் உருவான வாயுபுயல் குஜராத் பகுதியில் கரையை கடக்கும் என்று எதிர்பார்க்கப்பட்டது. ஆனால் காற்றின் போக்கு காரணமாக,  அந்த புயல் திசை மாறி மேற்கு நோக்கி நகர்ந்தது. அதனால் குஜராத் புயல் அபாயத்தில் இருந்து தப்பியது. ஆனால், நேற்றைய நிலவரப்படி காற்றின் போக்கு மாறியது, அதனால் மீண்டும் வாயு புயல் குஜராத் நோக்கி பயணிக்கத்  தொடங்கியுள்ளது.

வாயு புயல் அரபிக் கடலில் நிலை கொண்டு அங்கும் இங்கும் என்று போக்கு காட்டி வருவதால் கேரளாவில் பெய்ய வேண்டிய மழை குறைந்து விட்டது. வாயு புயல் கரையைக் கடந்தால்தான் கேரளாவிலும் மழை பெய்யும் என்ற நிலை  ஏற்பட்டுள்ளது. அங்கு மழை பெய்தால் தான் தமிழகத்திலும் மழை பெய்யும். இந்நிலையில், ஈரோடு, கோவை, நீலகிரி, சேலம், தேனி, திண்டுக்கல், கன்னியாகுமரி, சிவகங்கை, புதுக்கோட்டை ஆகிய இடங்களில் லேசானது முதல் மிதமான மழை பெய்யும் வாய்ப்புள்ளது. ஆனால், பெரும்பாலான இடங்களில் உருவாகியுள்ள  வறண்ட வானிலை காரணமாக வெயில் கொளுத்தி வருகிறது. அதிபட்சமாக சென்னை, பரங்கிப்பேட்டை, புதுச்சேரி, மதுரை ஆகிய இடங்களில் 106 டிகிரி வெயில் ெகாளுத்தியது. திருச்சி, கடலூர், வேலூர் 104 டிகிரி, திருத்தணி, காரைக்கால்,  நாகப்பட்டினம், தூத்துக்குடி 102 டிகிரி வெயில் நீடித்தது. இதன் தொடர்ச்சியாக தமிழகத்தில் திருவள்ளூர், திருவண்ணாமலை,சென்னை, காஞ்சிபுரம், கடலூர், விழுப்புரம், புதுச்சேரி, நாகப்பட்டினம், அரியலூர், திண்டுக்கல், பெரம்பலூர், கரூர்,  திருச்சி ஆகிய மாவட்டங்களில் 3 நாட்களுக்–்கு வெப்ப காற்று வீசும்.  இவ்வாறு வானிலை ஆய்வு மையம் அறிவித்துள்ளது.