தரமணியில் துணிகரம் டாஸ்மாக் கடையில் ₹5.30 லட்சம் கொள்ளை

வேளச்சேரி: தரமணி கட்டபொம்மன் தெருவில் டாஸ்மாக் கடை உள்ளது. இங்கு, மேற்பார்வையாளராக ராஜ்குமார் (40) என்பவர் பணியாற்றி வருகிறார். இவர் நேற்று முன்தினம் கடையில் மது விற்பனை செய்த ₹5.30 லட்சத்தை கடையின் கல்லாப் பெட்டியில் வைத்துவிட்டு, கடையை பூட்டி விட்டு சென்றார். இந்நிலையில், நேற்று மதியம் வழக்கம்போல் கடையை திறப்பதற்காக வந்தபோது, கடையின் பூட்டு உடைக்கப்பட்டு இருந்ததை பார்த்து அதிர்ச்சி அடைந்தார். உள்ளே சென்று பார்த்தபோது கல்லாப் பெட்டி உடைக்கப்பட்டு அதில் இருந்த ₹5.30 லட்சத்தை மர்ம நபர்கள் கொள்ளையடித்து சென்றது தெரிந்தது. இதுதொடர்பாக மேற்பார்வையாளர் ராஜ்குமார் தரமணி காவல் நிலையத்தில் புகார் கொடுத்தார்.

அதன்பேரில் குற்றப்பிரிவு போலீசார் கைரேகை நிபுணர்களுடன் சென்று கடையில் பதிவாகி இருந்த கொள்ளையர்களின் கைரேகைகளை பதிவு செய்தனர். மேலும் இதுகுறித்து வழக்குப்பதிந்து அந்தப் பகுதியில் உள்ள சிசிடிவி கேமரா பதிவுகளை ஆய்வு செய்து  கொள்ளையர்களை தேடி வருகின்றனர்.

மற்றொரு சம்பவம்: சென்னை நொளம்பூர் மேற்கு முகப்பேர்  சர்வீஸ் சாலையை சேர்ந்தவர் சீனிவாசன் (40). தனியார் நிறுவன ஊழியர்.  இவர் கடந்த 24ம் தேதி தனது குடும்பத்துடன் ஏலகிரிக்கு சுற்றுலா சென்றார். நேற்று சீனிவாசன் வீட்டை சுத்தம் செய்ய  வந்த வேலைக்காரி, வீட்டின் பூட்டு உடைக்கப்பட்டிருப்பதை  பார்த்து  அதிர்ச்சி அடைந்தார். உடனடியாக இதுகுறித்து சீனிவாசனுக்கு தகவல்  கொடுத்தார். தகவலறிந்த நொளம்பூர் போலீசார் சம்பவ இடத்துக்கு வந்து விசாரணை  செய்ததில் பீரோவில் இருந்த 14 சவரன் நகைகளை மர்ம நபர்கள் கொள்ளை அடித்து  சென்றது தெரியவந்தது.

Related Stories: