அந்தியூர்: அந்தியூர் அருகே மனைவி, குழந்தை முன்பு ஒர்க்‌ஷாப் ஓனர் கத்தியால் குத்தி கொலை செய்யப்பட்டார். இக்கொலை வழக்கில் ஒர்க்‌ஷாப் ஓனரின் மைத்துனரை போலீசார் தேடி வருகின்றனர். முறை தவறிய காதலால் இக்கொலை நடந்திருக்கலாம் என போலீசார் கருதுகின்றனர். ஈரோடு மாவட்டம் அந்தியூர் அருகே உள்ள ஒலகடம் பகுதியை சேர்ந்தவர் கைலாசம் (40). இவர் அந்தியூர் அருகே தவிட்டு பாளையத்தில் கடந்த நான்கு மாதங்களாக டிங்கரிங் ஒர்க் ஷாப் நடத்தி வந்தார். இவருக்கு திருமணமாகி நான்கு ஆண்டுகளாகிறது. ஹேமலதா(22)என்ற மனைவியும் சிவவர்ஷினி என்ற இரண்டரை வயது மகளும் உள்ளனர். இவர் புன்னம் பகுதியில் உள்ள தனது மாமனார் கண்ணன் வீட்டில் தங்கி இருந்தார். இந்நிலையில் நேற்று இரவு ஏழு மணிஅளவில் ஒர்க் ஷாப்பை மூடி விட்டு தனது மனைவி குழந்தையுடன், மாமனார் வீட்டிற்கு அந்தியூரில் இருந்து பைக்கில் கைலாசம் சென்று கொண்டிருந்தார். பவானி ரோட்டில், கணபதி கரட்டூர் என்ற இடத்தில் சென்ற போது, பின்னால் ஹெல்மெட் அணிந்து பைக்கில் வந்த ஒரு நபர் திடீரென இவருடைய கழுத்தில் கத்தியால் குத்தி கைலாசத்தின் செல்போனை பறித்துகொண்டு தப்பி ஓடினார்.

அதே இடத்தில் ரத்த வெள்ளத்தில் விழுந்த கைலாசம் உயிரிழந்தார். பவானி போலீஸ் டிஎஸ்பி சார்லஸ் தலைமையில் அந்தியூர் போலீசார் வழக்குப்பதிந்து, கொலைக்கு காரணம் கள்ளக்காதல் பிரச்னையா? என விசாரணை நடத்தி வருகின்றனர். இவ்வழக்கில் ஹேமலதாவின் பெரியப்பா மகன் புன்னம் பகுதியை ஆனந்தை(23) போலீசார் தேடி வருகின்றனர். இவர் தான் முறை தவறி ஹேமலதாவை ஒரு தலையாக காதலித்து வந்ததும் ஆத்திரத்தில் மைத்துனர் கைலாசத்தை கொலை செய்ததாகவும் போலீசாரின் முதல்கட்ட விசாரணையில் தெரிந்தது. அவரை பிடிக்க போலீசார் சேலம் மாவட்டம் மேட்டூர் சென்றுள்ளனர். மனைவி, குழந்தை கண் முன்னே, கணவன் கத்தியால் குத்தி கொலை செய்யப்பட்ட சம்பவம் அந்தப் பகுதியில் பெரும் பரபரப்பை ஏற்படுத்தி உள்ளது.

பொருத்தமான வரன்கள் உங்கள் சமூகத்தில், பதிவு இலவசம்! - தமிழ் மேட்ரிமோனி