பெரம்பூர்: அமைச்சர் ஜெயக்குமார் தொகுதியில் குடிநீரில் கழிவுநீர் கலந்து வருவதை கண்டித்தும், லாரிகளில் ேபாதிய குடிநீர் வழங்காததை கண்டித்தும் பொதுமக்கள் சாலை மறியலில் ஈடுபட்டனர். இதனால், ராயபுரம் பகுதியில் ஒரு மணி நேரம் போக்குவரத்து பாதிக்கப்பட்டது. ராயபுரம் தொகுதிக்கு உட்பட்ட பார்த்தசாரதி தெரு, லாலாகுண்டா, பென்சிலர் லைன், மின்ட் மாடம் சிட்டி, ரங்கநாதபுரம், சீனிவாசபுரம் உள்ளிட்ட பகுதிகளில் 20 ஆயிரத்துக்கு மேற்பட்ட மக்கள் வசித்து வருகின்றனர். இப்பகுதி மக்களுக்கு மாநகராட்சி சார்பில் பொது குழாய்களில் வழங்கப்படும் குடிநீரில், கடந்த சில மாதங்களாக கழிவுநீர் கலந்து வருவதாக கூறப்பதுகிறது. இதனால், இதை பயன்படுத்த முடியாத நிலை உள்ளது. இதை சீரமைக்க வேண்டும், என இப்பகுதி மக்கள் பலமுறை கோரிக்கை விடுத்தும், அதிகாரிகள் கண்டும் காணாமல் உள்ளதாக குற்றச்சாட்டு எழுந்துள்ளது. இந்நிலையில், லாரிகள் மூலம் வழங்கப்படும் குடிநீரும் போதிய அளவு இல்லாததால், இப்பகுதி மக்கள் கடும் அவதிக்குள்ளாகி வருகின்றனர்.