புதுடெல்லி: ‘‘ராணுவ வீரர்கள், விமானப்படை அதிகாரிகள், இந்துஸ்தான் ஏரோநெட்டிக்ஸ் ஊழியர்களுக்காக ரபேல் போர் விமான ஊழலில் நீதியை பெற்றே தீருவேன்’’ என்று ராகுல் காந்தி சூளுரைத்துள்ளார். ரபேல் போர் விமான ஊழல் தொடர்பாக மத்திய அரசு மீதும், பிரதமர் மோடி மீதும் காங்கிரஸ் தலைவர் தொடர் தாக்குதல் நடத்தி வருகிறார். உத்தர பிரதேச மாநிலம் அமேதி தொகுதியில் சுற்றுப்பயணம் மேற்கொண்ட அவர் பேசுகையில், ‘‘ரபேல் ஒப்பந்தத்தில் இப்போதுதான் வேடிக்கை தொடங்கியுள்ளது. இதுதொடக்கம்தான். இனிமேல் விஷயங்கள் மேலும் சுவாரஸ்யமாகும். விஜய் மல்லையா, ரபேல் விமானம், லலித் மோடி, பண மதிப்பிழப்பு நடவடிக்கை, ஜிஎஸ்டி ஆகிய விவகாரங்களில் மோடியின் பணியை நாங்கள் காட்டும் போது உங்களுக்கு மேலும் பல உண்மைகள் தெரிய வரும். இவை அனைத்தும் திருட்டுதான். பிரதமர் மோடி பாதுகாவலர் கிடையாது, கொள்ளையர் என்பதை ஒவ்வொன்றாக வெளியே கொண்டுவருவோம்” என்றார்.நேற்று தனது டிவிட்டரில் அவர் உருக்கமான பதிவு ஒன்றை வெளியிட்டுள்ளார். அதில், ‘இந்தியாவுக்காக சேவை செய்த ஒவ்வொரு விமானப்படை அதிகாரிக்கும், வீரர்களுக்கும், இந்த நாட்டிற்கான சேவையில் உயிர் நீத்த விமானப்படை பைலட் குடும்பத்திற்கும், இந்துஸ்தான் ஏரோநெட்டிக்ஸ் நிறுவனத்தில் பணியாற்றிய ஒவ்வொரு ஊழியர்களுக்கும், உங்கள் வலி எங்களுக்கு கேட்கிறது. உங்களின் வேதனையை நாங்கள் உணருகிறோம். உங்களை மரியாதைக் குறைவாக நடத்தி, உங்களிடம் இருந்து திருடியதற்காக நாங்கள் நீதியை பெற்றுத் தருவோம்’ என்று குறிப்பிட்டுள்ளார்.