சென்னை: நீர் நிலைகளை ஆக்கிரமிப்பு செய்தவர்களுக்கு எந்த சூழ்நிலையிலும் கருணை காட்டக் கூடாது என்று உத்தரவிட்டுள்ள உயர் நீதிமன்றம், ஆக்கிரமிப்புகளை அகற்றாத அதிகாரிகள் மீது ஒழுங்கு நடவடிக்கை எடுக்க வேண்டும் என்றும் தமிழக அரசுக்கு உத்தரவிட்டுள்ளது. கோவை மாவட்டம், மேட்டுப்பாளையம் தாலுகா இருப்பாநத்தம் கிராமத்தைச் சேர்ந்த லட்சுமணன், தனது குடும்பச் சொத்து பாகப்பிரிவினை செய்தபோது கிடைத்த நிலத்திற்கு தனது பெயரில் பட்டா வழங்க கோரி மேட்டுப்பாளையம் தாசில்தாரிடம் விண்ணப்பித்துள்ளார். ஆனால் அந்த நிலம் அரசு புறம்போக்கு நிலம் எனக்கூறி பட்டா வழங்க தாசில்தார் மறுத்து உத்தரவிட்டார். இதை எதிர்த்து லட்சுமணன் சென்னை உயர் நீதிமன்றத்தில் வழக்கு தொடர்ந்தார். இந்த வழக்கு நீதிபதி எஸ்.எம்.சுப்பிரமணியம் முன்னிலையில் விசாரணைக்கு வந்தது. வழக்கை விசாரித்த நீதிபதி அளித்த தீர்ப்பு வருமாறு: மனுதாரர் இந்த நிலம் தங்களது மூதாதையர்களின் நிலம். கடந்த 1931 முதல் தங்களின் பயன்பாட்டில் உள்ளது என்று கூறியுள்ளார். ஆனால், மேட்டுப்பாளையம் தாசில்தார், மனுதாரர் கூறும் நிலம் கரடு-புறம்போக்கு நிலமாகும். இந்த நிலம் ஆக்கிரமிக்கப்பட்டுள்ளது என்று கூறியுள்ளார். சம்பந்தப்பட்ட நிலத்தை கோவை மாவட்ட வருவாய் அதிகாரி ஆய்வு செய்து சட்டப்படி தகுந்த நடவடிக்கை எடுக்க வேண்டும்.