நடிகையை கத்தியால் குத்திவிட்டு தப்பிய வாலிபரை போலீசார் தேடி வருகின்றனர். இந்தி, தெலுங்கில் சில படங்களில் நடித்தவர் மாள்வி மல்கோத்ரா. இவர் சமீபத்தில்தான் துபாயிலிருந்து மும்பை திரும்பியிருந்தார். இந்நிலையில் நேற்று முன்தினம் இரவு வடமும்பையிலுள்ள வெர்சோவா பகுதியில் காபி ஷாப்புக்கு சென்று வெளியே வந்தார். அப்போது அங்கு காரில் வந்த வாலிபர் ஒருவர், மாள்வியிடம் தகராறில் ஈடுபட்டார். பின் திடீரென மறைத்து வைத்திருந்த கத்தியை எடுத்து மாள்வியின் வயிற்றில் குத்திவிட்டு தப்பிவிட்டார். ரத்த வெள்ளத்தில் கிடந்த மாள்வியை மீட்டு அங்கிருந்தவர்கள் மருத்துவமனையில் சேர்த்தனர். தீவிர சிகிச்சை பிரிவில் சேர்க்கப்பட்டு மாள்வி சிகிச்சை பெற்று வருகிறார். தற்போது அவர் அபாய கட்டத்தை தாண்டிவிட்டதாக டாக்டர்கள் தெரிவித்தனர்.