ஊட்டி, பிப். 6: ஊட்டி நகராட்சி மார்க்கெட்டில் முதல் தளத்தில் கடைகள் கட்டுவதற்கான கட்டுமான பணிகள் துவங்கி உள்ளது. ஊட்டி நகராட்சி மார்க்கெட்டில் சுமார் 1700க்கும் மேற்பட்ட கடைகள் இருந்தன. இந்த மார்க்கெட் கடந்த ஆங்கிலேயர் ஆட்சி காலத்தில் கட்டப்பட்டது. இதனால், இந்த மார்க்கெட்டை மேம்படுத்துவதுடன், பழமையான கட்டிடங்களை இடித்து விட்டு நவீன வசதிகளுடன் கூடிய புதிய கட்டிடங்கள் கட்டப்பட வேண்டும் என்ற கோரிக்கை எழுந்தது. இந்நிலையில், கலைஞர் நகர்ப்புற மேம்பாட்டு திட்டத்தின் கீழ் ஊட்டி நகராட்சி மார்க்கெட்டில் இடியும் நிலையில் உள்ள கட்டிடங்களை அகற்றி விட்டு புதிதாக கடைகள் கட்டும் நடவடிக்கையை நகராட்சி நிர்வாகம் கடந்த ஆண்டு துவக்கியது. முதற்கட்டமாக, காபி அவுஸ் பகுதிக்கு அருகே உள்ள பன்றி இறைச்சி கடைகள் முதல் எலக்ட்ரிக்கல் கடை வரை 190 பழுதடைந்த கடைகள் இடித்து விட்டு தரைத்தளத்தில் 126 நான்கு சக்கர வாகனங்கள், 163 இரு சக்கர வாகனங்கள் நிறுத்தும் வசதியுடன் பார்க்கிங் தளமும், முதல் தளத்தில் 240 கடைகள் கட்ட திட்டமிடப்பட்டது.
இதற்காக, கலைஞர் நகர்ப்புற மேம்பாட்டு திட்டத்தின் கீழ் ரூ.18 கோடி நிதி ஒதுக்கப்பட்டது. இடிக்கப்பட்ட கடைகளுக்கு பதிலாக ஏடிசி., பகுதியில் உள்ள பார்க்கிங் தளங்களில் முதற்கட்டமாக 100 கடைகள் கட்டப்பட்டன. அந்த கடைகளுக்கு வியாபாரிகள் இடம் மாற்றம் செய்யப்பட்டனர். இதில், வியாபாரிகள் கடைகள் வைத்து வியாபாரம் செய்து வருகின்றனர். மேலும், இரண்டாம் கட்டமாக மார்க்கெட்டில் கட்டுமான பணிகள் மேற்கொள்ள உள்ள நிலையில், அதற்கு தேவையான கடைகளும் தற்போது தற்காலிக மார்க்கெட்டில் கட்டப்பட்டு வருகிறது. இந்நிலையில், முதற்கட்டமாக இடிக்கப்பட்ட கடைகள் இருந்த இடத்தில் புதிய கடைகள் கட்டுமான பணிகள் வேகமாக நடந்து வருகிறது. தரைத்தளத்தில் பார்க்கிங் செய்வதற்கான கட்டுமான பணிகள் முடிந்த நிலையில், தற்போது முதல் தளத்தில் கடைகள் கட்டுவதற்கான கட்டுமான பணிகள் துவங்கி ஒரு வாரமாக நடந்து வருகிறது.
முதற்கட்டமாக, கான்கிரீட் தூண்கள் அமைக்கும் பணிகள் தற்போது நடந்து வருகிறது. இந்த பணிகள் ஓரிரு மாதங்களில் நிறைவுபெறும் என எதிர்பார்க்கப்படுகிறது. வரும் மே மாதத்திற்குள் இந்த கட்டுமான பணிகள் முடிந்தால், முதற்கட்டமாக இடிக்கப்பட்ட இடங்களில் கட்டப்பட்ட கடைகள் நகராட்சி நிர்வாகம் வியாபாரிகளுக்கு வழங்கும் என எதிர்பார்க்கப்படுகிறது. பருவ மழை துவங்கும் முன் இந்த கடைகள் கட்டுமான பகுதிகளை விரைந்து முடிக்க வேண்டும் என வியாபாரிகள் வலியுறுத்தி வருகின்றனர். அதற்கு ஏற்றார் போல் தற்போது கட்டுமான பணிகள் வேகப்படுத்தப்பட்டுள்ளது.
The post ஊட்டி நகராட்சி மார்க்கெட்டில் கடைகள் கட்டுமான பணிகள் தீவிரம் appeared first on Dinakaran.
