தஞ்சாவூர்: தஞ்சை தமிழ்பல்கலைக்கழகத்தில் பொறுப்பு துணைவேந்தர் மற்றும் பதிவாளர் ஆகியோர் ஒருவரை ஒருவர் நீக்குவதாக மாறி, மாறி ஆணை பிறப்பித்த நிலையில் புதிய பதிவாளர் நேற்று பதவி ஏற்க வந்தபோது அந்த அறைக்கு பழைய பதிவாளர் பூட்டு போட்டார். அதை உடைத்து அவர் பதவியேற்றதால் பரபரப்பு ஏற்பட்டது. தஞ்சை தமிழ் பல்கலைக்கழகத்தில் கடந்த 2017-18ல் பேராசிரியர், உதவி பேராசிரியர் பணியிடங்களில் 40 பேரை முறைகேடாக அப்போதைய துணைவேந்தர் நியமனம் செய்தது தொடர்பாக பொது நல வழக்கு விசாரணை நடந்து வருகிறது. இந்நிலையில் கடந்த 2021ல் துணைவேந்தராக திருவள்ளுவன் நியமிக்கப்பட்டார். இவர், முறைகேடாக நியமனம் செய்யப்பட்டதாக கூறப்பட்ட பேராசிரியர்களை தகுதி காண் பருவம் அடிப்படையில் நிரந்தர பணியில் அமர்த்த சிண்டிகேட்டில் ஒப்புதல் பெற்றதாக கூறப்பட்டது.
இதுகுறித்து தமிழக கவர்னர் தரப்பில் விளக்கம் கேட்கப்பட்டது. அதற்கு துணைவேந்தர் திருவள்ளுவன் முறையான பதில் அளிக்காததால் அவரை சஸ்பெண்ட் செய்து கவர்னர் ஆர்.என்.ரவி உத்தரவிட்டார். மேலும் ஓய்வு பெற்ற நீதிபதி ஜெயச்சந்திரன் தலைமையில் குழு அமைத்து விசாரணை நடத்தவும் உத்தரவிடப்பட்டது. இதையடுத்து தொழில் மற்றும் நில அறிவியல் துறை பேராசிரியர் சங்கரை பொறுப்பு துணைவேந்தராக கவர்னர் நியமித்தார். இந்நிலையில் பேராசிரியர், பணியாளர்கள் மற்றும் மாணவர்களிடம் அசாதாரண சூழல் ஏற்படும் நிலையை உருவாக்கி வருவதாகவும், பல்கலைகழகத்தில் சட்டம் ஒழுங்கு பிரச்னை ஏற்பட வாய்ப்பு உள்ளதாகவும் முன்னெச்சரிக்கை நடவடிக்கையாக பொறுப்பு துணைவேந்தர் சங்கருக்கு பதிலாக, பல்கலைக்கழக ஆட்சி குழு உறுப்பினர் பாரதஜோதியை துணைவேந்தர் பணிகளை கவனிக்க பொறுப்பு பதிவாளரான தியாகராஜன் ஆணை வெளியிட்டார்.
இதை தொடர்ந்து பொறுப்பு பதிவாளராக பணியாற்றும் தியாகராஜன், விசாரணை வரம்பிற்குட்பட்டு இருப்பதாலும், நிர்வாக காரணங்களுக்காகவும் பொறுப்பில் இருந்து நீக்கப்படுவதாகவும், அயல்நாட்டு தமிழ் கல்வித்துறையில் இணைப்பேராசிரியராக பணியாற்றும் வெற்றிச்செல்வனை நிரந்தர பதிவாளர் பணி நியமனம் செய்யும் வரை பதிவாளராக பணியாற்ற ஆணையிடுவதாகவும் பொறுப்பு துணைவேந்தர் சங்கர் ஒரு ஆணை வெளியிட்டார். இப்படி பொறுப்பு துணைவேந்தர் சங்கரும், பொறுப்பு பதிவாளர் தியாகராஜனும் மாறி, மாறி ஒருவரை ஒருவர் நீக்கியதாக ஆணை பிறப்பித்துள்ளது பெரும் சர்ச்சையை ஏற்படுத்தியுள்ளது.
இந்நிலையில் புதிய பதிவாளராக நியமிக்கப்பட்ட இணை பேராசிரியர் வெற்றிசெல்வன், நேற்று காலை 11 மணி அளவில் பதவியேற்க பல்கலைகழகத்துக்கு பலத்த போலீஸ் பாதுகாப்புடன் பதிவாளர் அறைக்கு வந்தார். அப்போது பதிவாளர் அறையை முன்னாள் பதிவாளர் தியாகராஜன் பூட்டு போட்டு பூட்டிவிட்டு வேறு ஒரு அறையில் ஆதரவாளர்களுடன் இருந்தார். இதனால் புதிய பதிவாளர் ெவற்றிசெல்வன் போலீஸ் உதவியுடன் தனது ஆதரவாளர்கள் மூலம் பூட்டை உடைத்து அறைக்குள் சென்று கோப்பில் கையெழுத்திட்டு பதிவாளராக பதவியேற்றுக்கொண்டார்.
சர்வாதிகாரத்தை காட்டுகிறது
மாஜி பதிவாளர் தியாகராஜன் நிருபர்களுக்கு அளித்த பேட்டியில், திருவள்ளுவருக்கு தமிழ் பல்கலைகழகத்தில் வெள்ளி விழா நடைபெற்று வரும் சூழலில் நிறுவனத்தின் பதிவாளர் அறையின் பூட்டை உடைத்து உள்ளே சென்றது வேதனைக்குரியது. அரசு ெசயலாளர் இருவரது ஆணைகளையும் ரத்து செய்து தொடர்ந்து இருவரும் பணியாற்றுங்கள் என உத்தரவிட்டுள்ளார். பல்கலை பணிகளை பார்க்க மட்டுமே பொறுப்பு துணை வேந்தருக்கு ஆணை வழங்கப்பட்டுள்ளது. ஆனால் அவர் இதுபோன்ற செயலில் ஈடுபடுவது சர்வாதிகாரத்தை காட்டுகிறது. அரசு செயலர் கேட்டுக்கொண்டதின்பேரில் இதுவரை நான் பதிவாளராக நீடித்து வருகிறேன் என்றார்.
மாஜி பதிவாளர் தியாகராஜன் சஸ்பெண்ட்
தமிழ் பல்கலைக்கழக துணைவேந்தர் (பொ) சங்கர் நேற்று வெளியிட்ட அறிக்கையில், தமிழ் மற்றும் தமிழ் வளர்ச்சித் துறை பேராசிரியர் தியாகராஜன், 28.06.2022 முதல் பதிவாளராக (பொ) செயல்பட்டு வந்தார். இவர் மீது ஏராளமான குற்றச்சாட்டுகள் உள்ளன. பதிவாளர் பொறுப்பிலிருந்து விடுவித்த பிறகும், கடந்த 28ம் தேதி பதிவாளர் அலுவலகத்தில் அத்துமீறி நுழைந்துள்ளார். இதனால் பல்கலைக்கழகத்தின் கல்வி தொடர்பான செயல்பாடுகளும், நிர்வாகச் செயல்பாடுகளும் கடுமையாகப் பாதிக்கப்பட்டுள்ளதோடு பல்கலைக்கழக அமைதிக்கு குந்தகம் ஏற்பட்டுள்ளதாலும், பல்கலைக்கழகத்தின் ஒழுங்கையும், கட்டுப்பாட்டையும் பாதுகாக்க வேண்டியது துணைவேந்தரின் கடமை என்பதாலும் தியாகராஜன் மீதான விசாரணையை பின் நிறுத்தி கடந்த 28ம் தேதி முதல் சஸ்பெண்ட் செய்து ஆணை பிறப்பிக்கப்பட்டுள்ளது என தெரிவித்துள்ளார்.
The post துணைவேந்தர், பதிவாளர் மாறி மாறி நீக்கப்பட்டதாக அறிவிப்பு; புதிய பதிவாளர் பதவி ஏற்க வந்தபோது அறைக்கு பூட்டு போட்ட மாஜி பதிவாளர்: பூட்டை உடைத்து பதவியேற்றதால் தஞ்சை தமிழ் பல்கலை.யில் பரபரப்பு appeared first on Dinakaran.
