சென்னை: வடபழனி மற்றும் அதன் சுற்றுவட்டராப்பகுதிகளில் வசிக்கும் சினிமா பிரபலங்களுக்கு கூட்டாளி உதவியுடன் போதை பொருள் விற்று வந்த காவலரை போலீசார் பொறிவைத்து கைது செய்தனர். அவரிடம் இருந்து 10 கிராம் மெத்தம்பெட்டமைன் பறிமுதல் செய்யப்பட்டது. சென்னை பெருநகர காவல் எல்லையில் போதை பொருள் முற்றிலும் ஒழிக்கும் வகையில் போலீஸ் கமிஷனர் அருண் பல்வேறு அதிரடி நடவடிக்கை எடுத்து வருகிறார். அதன்படி உதவி கமிஷனர் ஒருவர் தலைமையில் புதிதாக போதை பொருள் நுண்ணறிவு பிரிவு என்று தனியாக தொடங்கி சென்னை முழுவதும் அதிரடி வேட்டை நடத்தி வருகின்றனர். அந்த வகையில் வடபழனி, கோடம்பாக்கம், சாலிகிராமம் உள்ளிட்ட பகுதிகளில் வசிக்கும் சினிமா பிரபலங்கள் மற்றும் வசதியான நபர்களுக்கு மெத்தம்பெட்டமைன் என்ற போதை பொருள் விற்பனை செய்வதாக தனிப்படையினருக்கு ரகசிய தகவல் கிடைத்தது.
அதன்படி வடபழனியில் உள்ள பிரபல வணிக வளாகம் உள்ளிட்ட பகுதிகளில் தனிப்படையினர் மெத்தம்பெட்டமைன் வாங்குவது போல் ரகசியமாக பெரியார் நகரை சேர்ந்த சுரேந்திரநாத்(37) என்பவரை தொடர்பு கொண்டனர். அப்போது அவரிடம் போதை பொருள் கேட்பது போல் வடபழனி பகுதிக்கு வரவழைத்து தனிப்படையினர் அதிரடியாக கைது செய்தனர். பின்னர் அவரிடம் விசாரணை நடத்திய போது, மெத்தம்பெட்டமைன் என்ற போதை பொருளை அசோக் நகர் காவல் நிலையத்தில் காவலராக பணியாற்றி வரும் ஜேம்ஸ்(35) என்பவர் மூலம் பெற்று சினிமா பிரபலங்கள் மற்றும் ஐடி ஊழியர்களுக்கு ஆர்டர் படி விற்பனை செய்து வந்தது தெரியவந்தது. அதைதொடர்ந்து தனிப்படையினர் பிடிபட்ட சுரேந்திரநாத் மூலம் மேலும் போதைபொருள் வேண்டும் என்று காவலர் ஜேம்ஸை தொடர்பு கொண்டு நேரில் வரவழைத்து கையும் களவுமாக பிடித்தனர்.
இருவரிடம் இருந்து 10 கிராம் மெத்தம்பெட்டமைன் போதை பொருள் பறிமுதல் செய்யப்பட்டது. பிடிபட்ட காவலர் ஜேம்ஸ் வடபழனி ஒட்டகப்பாளையம் 5வது தெருவில் தனது குடும்பத்துடன் வசித்து வருகிறார். இவர் தனது நண்பர்கள் மற்றும் சில வாலிபர்கள் உதவியுடன் பல மாதங்களாக மெத்தம்பெட்டமைன் போதை பொருள் விற்பனை செய்து வந்ததும் விசாரணையில் உறுதியானது. அதைதொடர்ந்து தனிப்படையினர் பிடிபட்ட காவலர் ஜேம்ஸ் மற்றும் அவரது கூட்டாளி சுநேரந்திரநாத் ஆகியோரை வடபழனி காவல் நிலையத்தில் ஒப்படைத்தனர். அதன்படி வடபழனி போலீசார் காவலர் உட்பட 2 பேர் மீது வழக்கு பதிவு செய்து அதிரடியாக கைது செய்தனர்.
மேலும் போதை பொருள் விற்பனை தொடர்பாக கைது செய்யப்பட்ட காவலரிடம் போலீசார் தொடர்ந்து விசாரணை நடத்தி வருகின்றனர். சென்னையில் சினிமா பிரபலங்களுக்கு போதை பொருள் விற்பனையில் ஈடுபட்டு காவலர் ஒருவர் கைது செய்யப்பட்ட தகவல் போலீசாரிடையே பெரும் அதிர்ச்சியை ஏற்படுத்தியுள்ளது.
The post சென்னையில் சினிமா பிரபலங்களுக்கு கூட்டாளி மூலம் போதை பொருள் விற்ற காவலர் அதிரடி கைது: 10 கிராம் மெத்தம்பெட்டமைன் பறிமுதல் appeared first on Dinakaran.
