விக்கிரவாண்டி, நவ. 23: பெரிய தச்சூர் அருகே நிகழ்ந்த தீவிபத்தில் 2 வீடுகள் எரிந்து நாசமானது. விழுப்புரம் மாவட்டம் மயிலம் தொகுதிக்குட்பட்ட ஆலகிராம் பகுதியைச் சேர்ந்தவர் தேவராஜ். இவரது வீட்டில் நேற்று யாரும் இல்லாதபோது திடீரென மின் கசிவு ஏற்பட்டு வீடு தீப்பிடித்து எரிந்தது. இதைக் கண்ட அக்கம் பக்கத்தினர் தீயை அணைக்க முயன்றனர். மேலும் தீயணைப்பு துறையினருக்கு தகவல் தெரிவித்தனர். இதனிடையே பக்கத்தில் உள்ள நாராயணன் வீட்டிற்கும் தீ மளமளவென பரவியது. தொடர்ந்து தீயணைப்பு வீரர்கள் சம்பவ இடத்திற்கு விரைந்து தீயை அணைத்தனர். இருந்தபோதிலும் நாராயணன், தேவராஜ் ஆகியோரது வீடுகள் முற்றிலும் எரிந்து சாம்பலானது. மேலும் வீட்டு பக்கத்தில் இருந்த ஆட்டு கொட்டகையும் எரிந்தது. இதில் கொட்டகையில் இருந்த 9 ஆடுகளும் தீயில் கருகி இறந்தன. ஒவ்வொரு வீட்டிலும் தலா 2 லட்சம் ரூபாய் மதிப்பிலான பொருட்கள் எரிந்து நாசமானது. இது தொடர்பாக பெரியதச்சூர் போலீசார் வழக்கு பதிந்து விசாரணை மேற்கொண்டு வருகின்றனர்.

The post தீ விபத்தில் 2 வீடுகள் சேதம் appeared first on Dinakaran.