செங்கல்பட்டு: செங்கல்பட்டு அருகே மதுகுடிப்பதற்கு இடையூறாக இருந்த தகராறில் பால் வியாபாரியான பெண்ணை சரமாரி அரிவாளால் வெட்டிவிட்டு தப்பிய 5 பேர் கும்பலை போலீசார் தேடி வருகின்றனர். செங்கல்பட்டு அருகே மகேந்திராசிட்டி அடுத்த டாக்காநகர் பகுதியில் வசித்து வருபவர் சீதாராமன். இவருக்கு கன்னியம்மாள் (46) என்ற மனைவியும், சிவா (26), தினேஷ் (25) ஆகிய இரு மகன்களும் உள்ளனர். இவர்கள் மாடுகளை வளர்த்து பால் வியாபாரம் செய்யும் தொழில் செய்து வருகின்றனர். இந்நிலையில் நேற்று வழக்கம்போல் டாக்காநகர் பகுதியில் உள்ள கட்டி முடிக்கப்படாத கட்டிடம் அருகில் கன்னியம்மாள் மாடுகளை மேய்த்துகொண்டிருந்தார். பின்னர், மாடுகளை வீட்டுக்கு ஓட்டி செல்ல தினேஷ் அங்கு வந்துள்ளார்.

அப்போது அங்கு வந்த செட்டிப்புண்ணியம் பகுதியை சேர்ந்த அர்ஜுன், அய்யனார், தமிழ் மற்றும் அவரது நண்பர்கள் 2 பேர் என 5 பேர் அந்த பகுதியில் மதுகுடிப்பதற்காக நின்றுகொண்டிருந்தனர். அப்போது, அங்கிருந்த அப்பார்ட்மென்ட் செக்யூரிட்டி, கன்னியம்மாள், தினேஷ் ஆகியோரை பழைய கட்டிடத்துக்குள் அனுமதித்துள்ளார். ஆனால் மதுகுடிக்க வந்த 5 பேரையும் அனுமதிக்கவில்லை. இதனால் அவர்கள், எங்களை அனுமதிக்க முடியாதா? என செக்யூரிட்டி மற்றும் தினேஷிடம் வாக்குவாதத்தில் ஈடுபட்டுள்ளனர். இதுகுறித்து தினேஷின் தாய் கன்னியம்மாள் மறைமலைநகர் காவல்நிலையத்துக்கு தகவல் தெரிவித்துள்ளார். போலீசார் வந்து இரு தரப்பினரிடமும் பேசி சமரசம் செய்து அனுப்பி வைத்தனர்.

இதற்கிடையில், 5 பேரும் அளவுக்கதிகமான மதுபோதையில் தினேஷை தாக்குவதற்காக அவரது வீட்டிற்கு சென்றுள்ளனர். அப்போது கன்னியம்மாள், மகன்கள் இருவரையும் வீட்டுக்குள் வைத்து பூட்டிவிட்டு வெளியில் வந்து அவர்களிடம் பேசியுள்ளார். எங்களை போலீஸில் மாட்டிவிடுறியா? என பேசிக்கொண்டே 5 பேரும் கன்னியம்மாளின் தலை, கை உள்ளிட்ட இடங்களில் கத்தியால் சரமாரி வெட்டியுள்ளனர். வலிதாங்க முடியாமல் கன்னியம்மாளின் அலறல் சத்தம் கேட்டு அக்கம்பக்கத்தினர் ஓடிவந்தனர். பொதுமக்களை பார்த்ததும் 5 பேரும் அங்கிருந்து தப்பிஓடிவிட்டனர். ரத்த வெள்ளத்தில் இருந்த கன்னியம்மாளை செங்கல்பட்டு அரசு மருத்துவமனைக்கு அனுப்பிவைத்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.

The post செங்கல்பட்டு அருகே மதுகுடிக்க இடையூறு; பெண்ணுக்கு சரமாரி அரிவாள் வெட்டு: 5 பேர் கும்பலுக்கு வலை appeared first on Dinakaran.