சென்னை: சென்னையில் இருந்து சிங்கப்பூர் செல்ல இருந்த ஏர் இந்தியா எக்ஸ்பிரஸ் விமானத்தில் திடீர் இயந்திர கோளாறு ஏற்பட்டதால் பரபரப்பு நிலவியது. சென்னை சர்வதேச விமான நிலையத்திலிருந்து சிங்கப்பூர் செல்லும் ஏர் இந்தியா எக்ஸ்பிரஸ் விமானம் இன்று அதிகாலை 2.50 மணிக்கு புறப்பட தயாரானது. இதில் 240 பயணிகள் கேப்டன் உள்ளிட்ட 10 ஊழியர்கள் என மொத்தம் 250 பேர் இருந்தனர். விமானம் ஓடுபாதையில் ஓடத் தொடங்கும் முன்பே இயந்திரக்கோளாறை விமானி கண்டுபிடித்ததால் விமானத்தை விமானி உடனடியாக நிறுத்தினார். இதனால் பெரும் விபத்து தவிர்க்கப்பட்டது.

விமானத்தில் ஏற்பட்ட இயந்திர கோளாறு குறித்து சென்னை விமான நிலைய கட்டுப்பாட்டு அறைக்கு விமானி தகவல் தெரிவித்தார். தகவலின் பேரில் விமானத்தின் கதவுகள் திறக்கப்பட்டு உடனடியாக பயணிகள் அனைவரும் விமானத்தில் இருந்து கீழே இறக்கப்பட்டனர். இயந்திரக்கோளாறை விமானி கண்டுபிடித்ததால் 240 பயணிகள் உட்பட 250 பேர் நல்வாய்ப்பாக உயிர்த்தப்பினர். பயணிகள் அனைவரும் சென்னை நகரில் உள்ள பல்வேறு ஹோட்டல்களில் தங்க வைக்கப்பட்டுள்ளனர். இன்று இரவு அல்லது நாளை அதிகாலை விமானம் சிங்கப்பூர் புறப்பட்டுச் செல்லும் என்று அறிவிக்கப்பட்டுள்ளது.விமான பொறியாளர்கள் குழுவினர் விமானத்துக்குள் ஏறி, விமானத்தை பழுது பார்க்கும் முயற்சியில் ஈடுபட்டுள்ளனர்.

The post சென்னையில் இருந்து சிங்கப்பூர் செல்ல இருந்த ஏர் இந்தியா எக்ஸ்பிரஸ் விமானத்தில் திடீர் இயந்திர கோளாறு..!! appeared first on Dinakaran.