டெல்லி: டெல்லி ஜந்தர் மந்தரில் இந்தியா கூட்டணிக் கட்சிகளின் சார்பில் வரும் 30-ம் தேதி போராட்டம் நடைபெற உள்ளதாக ஆம் ஆத்மி அறிவித்துள்ளது. மதுபான கொள்கை முறைகேடு வழக்கில் டெல்லி முதல்வர் அரவிந்த் கெஜ்ரிவால் கடந்த மார்ச் 21ம் தேதி அமலாக்கத் துறையால் கைது செய்யப்பட்டார். இதையடுத்து அரவிந்த் கெஜ்ரிவால் திகார் சிறையில் அடைக்கப்பட்டார். சிறையில் இருந்தாலும் கெஜ்ரிவால் தனது முதல்வர் பதவியை ராஜினாமா செய்யாமல் உள்ளார். மக்களவைத் தேர்தலின் போது பரப்புரை மேற்கொள்ள அரவிந்த் கெஜ்ரிவாலுக்கு இடைக்கால ஜாமீன் வழங்கப்பட்டது. தேர்தல் நிறைவடைந்த பிறகு ஜூன் 2 ம் தேதி மீண்டும் திகார் சிறையில் சரண் அடைந்தார் அரவிந்த் கெஜ்ரிவால். கடந்த ஜூன் மாதம் 26ம் தேதி திகார் சிறையிர் இருந்த அரவிந்த் கெஜ்ரிவால் சிபிஐயால் கைது செய்யப்பட்டார்.
இதனிடையே அமலாக்கத்துறை கைதுக்கு எதிராக அரவிந்த் கெஜ்ரிவால் ஜாமீன் கோரி மீண்டும் தாக்கல் செய்த மனு கடந்த 12ம் தேதி உச்சநீதிமன்றத்தில் விசாரணைக்கு வந்தது. அப்போது அரவிந்த் கெஜ்ரிவால் 90 நாட்களுக்கும் மேலாக சிறையில் கஷ்டப்பட்டுள்ளதாக கூறி அவருக்கு உச்சநீதிமன்றம் ஜாமீன் வழங்கியது. ஆனால் சிபிஐயும் அரவிந்த் கெஜ்ரிவாலைக் கைது செய்திருந்ததால் அவரால் சிறையில் இருந்து வெளியே வர முடியாத சூழல் ஏற்பட்டது. இந்நிலையில் சிபிஐ பதிவு செய்த வழக்கில் அரவிந்த் கெஜ்ரிவாலுக்கு ஆகஸ்ட் 8ம் தேதி வரை நீதிமன்ற காவலை நீட்டித்து டெல்லி ரோஸ் அவென்யூ கோர்ட்டு உத்தரவிட்டுள்ளது. முன்னதாக இன்று அவர் காணொலி காட்சி வாயிலாக திகார் சிறையில் இருந்து நீதிபதி முன்பு ஆஜர்படுத்தப்பட்டார். சிறையில் உள்ள அரவிந்த் கெஜ்ரிவாலின் உடல்நலம் பாதிக்கப்பட்டுள்ளதாகவும் சிறையில் அவருக்கு மருத்துவ உதவிகள் வழங்கப்படவில்லை என்றும் ஆம் ஆத்மி கட்சி குற்றம் சாட்டியுள்ளது.
இந்நிலையில், திகார் சிறை நிர்வாகம் மற்றும் ஒன்றிய அரசைக் கண்டித்து டெல்லியில் வருகிற 30ம் தேதி இந்தியா கூட்டணி சார்பில் போராட்டம் நடத்தப்பட உள்ளதாக ஆம் ஆத்மி கட்சி அறிவித்துள்ளது. சிறையில் உள்ள கெஜ்ரிவாலுக்கு உரிய சிகிச்சை தர வலியுறுத்தி டெல்லி ஜந்தர் மந்தரில் போராட்டம் நடத்தப்படும் என்று தெரிவிக்கப்பட்டுள்ளது. டெல்லி திகார் சிறையில் உள்ள கெஜ்ரிவாலுக்கு மருத்துவ உதவிகள் வழங்கப்படவில்லை. சிறையில் உள்ள கெஜ்ரிவாலை இந்தியா கூட்டணியினர் நேரில் சந்திக்க வேண்டும் என ஆம் ஆத்மி கோரிக்கை வைத்துள்ளது.
The post அரவிந்த் கெஜ்ரிவால் உடல்நிலை விவகாரம்.. டெல்லியில் 30ம் தேதி இந்தியா கூட்டணி சார்பில் போராட்டம்: ஆம் ஆத்மி அறிவிப்பு!! appeared first on Dinakaran.