ஊட்டி, செப். 30:ஊட்டி அருகே பர்ன்ஹில் பகுதியில் அடுத்தடுத்த வீடுகளில் 8 பவுன் நகை, ரூ.1 லட்சம் ரொக்கத்தை மர்ம நபர்கள் கொள்ளை அடித்து சென்றனர். புதுக்கோட்டை மாவட்டத்தை சேர்ந்தவர் நாச்சிமுத்து. பொறியாளர். இவர், தற்போது வீட்டில் இருந்து பணியாற்றி வருகிறார். குடும்பத்துடன் பர்ன்ஹில் பகுதியில் வசித்து வருகிறார். இவரது மகன் ஊட்டியில் உள்ள தனியார் பள்ளியில் படித்து வருகிறார். இந்நிலையில், கடந்த 19ம் தேதி நாச்சிமுத்து வீட்டின் அருகில் இருந்த ஒரு வீட்டில் ரூ.1 லட்சம் பணம் கொள்ளை போனது. இதனால் பதறிப்போன நாச்சிமுத்து தனது வீட்டிலும் சோதனை செய்தார். அப்போது அவரது வீட்டில் இருந்த 8 பவுன் நகை மாயமாகி இருந்தது தெரியவந்தது. இதுகுறித்து நாச்சிமுத்து மற்றும் அக்கம்பக்கத்தினர் ஊட்டி பி1 காவல் நிலையத்தில் புகார் அளித்தனர்.