திருப்பூர், ஜன.19: தமிழகத்தில் கடந்தாண்டு டிசம்பர் 20ம் தேதி, திருப்பூர் உள்ளிட்ட அனைத்து மருத்துவ கல்லூரிகளில் உள்ள எம்பிபிஎஸ், பிடிஎஸ் படிப்புகளுக்கான விண்ணப்பம் இணையதளத்தில் வெளியிடப்பட்டது. ‘நீட்’ தேர்வில் தேர்ச்சி பெற்ற தகுதியுடையவர்கள் விண்ணப்பிக்க அழைப்பு விடுக்கப்பட்டது. திருப்பூர் மருத்துவக்கல்லூரியில் 100 இடங்கள் ஒதுக்கப்பட்டன. திருப்பூர் தலைமை அரசு மருத்துவமனையில் மாணவர்களுக்கான உதவி மையம், ஆன்லைன் மூலம் விண்ணப்பிக்க வசதி ஏற்படுத்தப்பட்டது. நடப்பாண்டு, ஜனவரி 7 வரை விண்ணப்பிக்க கால அவகாசம் வழங்கப்பட்டது. பலரும் விண்ணப்பித்த நிலையில், எம்பிபிஎஸ், பிடிஎஸ் படிப்புகளுக்கான அகில இந்திய கவுன்சிலிங் 19ம் தேதி (இன்று) இணையதள வாயிலாக (www.ncc.nic.in) துவங்குகிறது. மாணவர்கள், வரும் 24ம் தேதி வரை பதிவு செய்ய வேண்டும். 20 முதல் 24ம் தேதி வரை இடங்களை தேர்வு செய்யலாம்.