திருப்பூர், டிச. 8: பின்னலாடை சரக்குகளை கொண்டு செல்லும் கன்டெய்னர்களின் கட்டண உயர்வை குறைக்க நடவடிக்கை எடுக்க வேண்டும் என திருப்பூர் ஏற்றுமதியாளர்கள் சங்கம் கோரிக்கை விடுத்துள்ளது.திருப்பூரில் இருந்து தினமும் பல கோடி ரூபாய்க்கு ஆடைகள் ஏற்றுமதி செய்யப்படுகிறது. இதுபோல் உள்நாட்டு வர்த்தகமும் நடந்து வருகிறது. வெளிநாடுகளுக்கு ஏற்றுமதி செய்யப்படுகிற பின்னலாடைகள் திருப்பூரில் இருந்து சென்னை, தூத்துக்குடி உள்ளிட்ட துறைமுகங்களுக்கு கனரக வாகனங்களில் கொண்டு செல்லப்படுகின்றன. அங்கிருந்து கன்டெய்னர்கள் மூலம் கப்பல்களில் வெளிநாடுகளுக்கு பின்னலாடைகள் அனுப்பப்படுகின்றன. இந்நிலையில் கொரோனா பாதிப்பின் காரணமாக கன்டெய்னர்கள் பற்றாக்குறை கடுமையாக ஏற்பட்டது. இதனால் கன்டெய்னர்கள் கட்டணமும் அதிகமாக உயர்ந்துள்ளது. இந்த கட்டண உயர்வினால் திருப்பூரில் பெரும்பாலான ஏற்றுமதியாளர்கள் கவலையடைந்துள்ளனர். மேலும், கட்டண உயர்வை குறைக்க நடவடிக்கை எடுக்க வேண்டும் எனவும் மத்திய, மாநில அரசுகளுக்கு கோரிக்கையும் விடுத்துள்ளனர்.