சிவகங்கை, ஏப்.18 மாவவட்டத்தில் ஜனவரி முதல் தற்போது வரை கூடுதலாக மழை பெய்துள்ளது. சிவகங்கை மாவட்டத்தில் ஆண்டு சராசரி மழையளவு 904.7 மி.மீ ஆகும். ஆனால் கடந்த 2008ம் ஆண்டிற்கு பிறகு ஆண்டுதோறும் சீரான அளவில் மழை பெய்யவில்லை. 2008 முதல் 2019ம் ஆண்டு வரை இடைப்பட்ட 11 ஆண்டுகளில் அதிகபட்சமாக 2008ம் ஆண்டு 1283மி.மீ மழை பெய்ததே அதிகமான அளவாகும். 2012ம் ஆண்டு 549மி.மீ மழை பெய்ததே இந்த 9ஆண்டுகளில் மிகக்குறைந்த அளவில் பெய்த மழை அளவாகும். 2009ம் ஆண்டு 772மி.மீ, 2010ம் ஆண்டு 916மி.மீ, 2011ம் ஆண்டு 872மி.மீ, 2013ம் ஆண்டு 705மி.மீ மழை பெய்தது. 2014ம் ஆண்டு 920மி.மீ மழை பதிவாகியுள்ளது. 2015ம் ஆண்டில் 1097மி.மீ, 2016ம் ஆண்டு 706.5 மி.மீ மழை பெய்துள்ளது. 2017ம் ஆண்டு 976.6 மி.மீ மழை பதிவாகியுள்ளது. 2018ம் ஆண்டு 924.4மி.மீ மழை, 2019ம் ஆண்டு 1006.7மி.மீ மழை பதிவாகியுள்ளது. 2020ம் ஆண்டு 1114.8மி.மீ மழை பதிவாகியுள்ளது. ஆண்டுதோறும் தென் மேற்கு பருவமழை 309.6மி.மீ, வடகிழக்கு பருவமழை 413.7மி.மீ சராசரியாக பெய்ய வேண்டும். இந்த ஆண்டு ஜனவரி முதல் தற்போது வரை 218.43மி.மீ மழை பதிவாகியுள்ளது. வழக்கமாக ஜனவரி முதல் மே மாதம் வரை குறைவான அளவே மழை பதிவாகும். ஆனால் இந்த ஆண்டு கடந்த ஜனவரியிலும் தற்போதும் மாவட்டத்தின் பல்வேறு பகுதிகளில் கன மழை பெய்து வருகிறது.