பண்ருட்டி, ஏப். 10: கடலூர் மாவட்டம், பண்ருட்டி அருகே நடுக்குப்பம் கிராமத்தை சேர்ந்தவர் அருணாசலம்(31), கூலிதொழிலாளி. இவருக்கும் காங்கிருப்பு கிராமத்தை சேர்ந்த லட்சுமி (29) என்பவருக்கும் கடந்த 2020ம் ஆண்டு, ஜூன் மாதம் பெற்றோரின் சம்மதத்துடன் திருமணம் நடந்தது. திருமணம் ஆன நாள் முதல் இருவரும் மகிழ்ச்சியாக குடும்பம் நடத்தி வந்தனர். இதில் திருமணமாகி லட்சுமி எட்டு மாத காலத்தில் குழந்தை ஒன்றை பெற்றெடுத்தார். அதிர்ச்சி அடைந்த அருணாசலம் அவரது நடத்தையில் சந்தேகப்பட்டு தகராறு செய்து வந்துள்ளார். இதனையடுத்து லட்சுமி கோபித்துக் கொண்டு தன் தாய் வீடான காங்கிருப்பு கிராமத்திற்கு சென்று விட்டார். இதன் காரணமாக அருணாசலம் மனவேதனையில் இருந்து வந்துள்ளார். இதனிடையே லட்சுமியின் பெற்றோர் இருவரையும் சமாதானம் செய்ததையடுத்து, இருவரும் குடும்பம் நடத்தினர். ஒரு சில தினங்களே இருவரும் மகிழ்ச்சியாக வாழ்ந்து வந்த நிலையில் மீண்டும் அருணாசலம் மனதில் சந்தேக தீ எழுந்தது. இதையடுத்து, அவர், தனது மனைவியை விவாகரத்து செய்ய கடலூர் நீதிமன்றத்தில் மனு தாக்கல் செய்திருந்தார். இந்நிலையில் நேற்று முன்தினம் இரவு கணவன், மனைவிக்குள் மீண்டும் தகராறு ஏற்பட்டுள்ளது. இதில், லட்சுமியை அருணாசலம் சரமாரியாக தாக்கியுள்ளார். பின்னர் துணியால் லட்சுமியின் கழுத்தை நெரித்து கொலை செய்துள்ளார். ஒரு கட்டத்தில் மனைவியை கொன்று விட்டோமே என்ற குற்ற உணர்ச்சியில், அருணாசலம் தற்கொலை முயற்சியில் ஈடுபட்டார். அப்போது, குழந்தையின் அழுகுரல் கேட்டு தன் மனதை மாற்றிக்கொண்டார். பின்னர் நேற்று காலை முத்தாண்டிக்குப்பம் காவல்நிலையத்திற்கு சென்று நடந்தவற்றை கூறி சரணடைந்தார்.